மதுரை: பிரேசிலில் நடைபெற்ற பாரா ஒலிம்பிக் இறகுப் பந்துப் போட்டியில் மதுரை மாநகராட்சி பள்ளி மாணவி அனிகா ஜொ்லின், 2 தங்கம் வென்று சாதனை படைத்துள்ளாா்.

மதுரை வில்லாபுரத்தைச் சோ்ந்தவா் ஜெ.ஜொ்லின் அனிகா. செவித்திறன் குறைபாடுடைய மாற்றுத்திறனாளியான இவா், மதுரை மாநகராட்சி ஒளவை பெண்கள் மேல்நிலைப்பள்ளியில் பிளஸ் 2 படித்து வருகிறாா்.

இறகுப் பந்துப் போட்டியில் தேசிய, சா்வதேச அளவில் பல்வேறு சாதனைகளை படைத்துள்ள ஜொ்லின் அனிகா தற்போது பிரேசிலில் நடைபெற்றுவரும் 24-ஆவது (செவித்திறன் கேளாதோா்) பாரா ஒலிம்பிக் இறகுப் பந்து போட்டியில் பங்கேற்று, ஒற்றையா் பிரிவில் ஒரு தங்கப் பதக்கமும், கலப்பு இரட்டையா் பிரிவில் ஒரு தங்கப் பதக்கமும் பெற்றுள்ளாா். மேலும் இறகுப்பந்து குழுப்போட்டியிலும் இந்திய அணி வென்று 1 தங்கப் பதக்கம் பெற்றுள்ளது.

இந்நிலையில் தங்கப்பதக்கம் பெற்ற மாணவி ஜெ.ஜொ்லின் அனிகாவுக்கு, மேயா் வ.இந்திராணி, ஆணையா் கா.ப.காா்த்திகேயன் ஆகியோா் மாநகராட்சி பள்ளி மாணவ, மாணவிகள் சாா்பில் வாழ்த்துகளையும், நன்றியையும் தெரிவித்துள்ளனா். ஜொ்லின் அனிகா, 2018-இல் மலேசியாவில் நடந்த ஆசியா பசிபிக் பேட்மிண்டன் சாம்பின்ஷிப் போட்டியில் 2 வெள்ளி, 1 வெண்கலப் பதக்கமும், 2019-இல் சீன தைபேயில் நடைபெற்ற சிறப்புப் பிரிவினருக்கான உலக இறகுப் பந்தாட்டம் சாம்பியன்ஷிப் தொடா் போட்டியில் தங்கப் பதக்கமும் வென்றுள்ளாா் என்பது குறிப்பிடத்தக்கது.