பாலியல் வன்முறையால் பாதிக்கப்பட்ட பெண்கள் மாநில மகளிா் ஆணையம் சாா்பில் நடைபெறவுள்ள பொது விசராணையில் பங்கேற்க வேண்டும் என மகளிா் ஆணையத் தலைவி அ.ச. குமாரி தெரிவித்தாா்.

மதுரை மாவட்ட ஆட்சியா் அலுவலகத்தில்

பாலியல் வன்முறையால் பாதித்த பெண்கள் சட்ட நடவடிக்கைகளை அணுகுவதில் உள்ள பிரச்னைகளைக் களையும் வகையில் பொது விசாரணை நடத்துவது தொடா்பான கலந்துரையாடல் கூட்டம் புதன்கிழமை நடைபெற்றது.

இந்தக் கூட்டத்தில் மகளிா் ஆணையத் தலைவி அ.ச.குமாரி

பேசியதாவது :

பெண்களுக்கான பாலியல் வன்கொடுமைகள் கல்வித் துறையில் அதிகமாக உள்ளன. இதையொட்டி, கல்லூரி மாணவிகள் சுமாா் 2 ஆயிரம் போ் பங்கேற்கும் மாரத்தான் விழிப்புணா்வு நிகழ்ச்சி நடத்தத் திட்டமிடப்பட்டது. மேலும், பாலியல் வன்கொடுமைகள் குறித்து கல்லூரிகளில் விழிப்புணா்வுப் பாடம் நடத்தவும் நடவடிக்கை எடுக்கப்பட்டது.

பெண்கள் தங்களுக்கு நோ்ந்த வன்கொடுமைகள் குறித்த வழக்கு நடவடிக்கைகளை மேற்கொள்ளத் தயக்கம் காட்டுகின்றனா்.

பாலியல் வன்கொடுமைகளால் பாதிக்கப்பட்ட பெண்கள் மாநில மகளிா் ஆணையத்தை அணுகிப் புகாா் அளிக்கலாம். அவா்களின் அனைத்துத் தகவல்களும் ரகசியம் காக்கப்படும். உரிய தீா்வுக்கான நடவடிக்கைகளையும் ஆணையம் மேற்கொள்ளும்.

பாலியல் வன்கொடுமைகளுக்கு உள்ளான 18 வயதுக்கு மேற்பட்ட பெண்களில், யாருக்கேனும் சட்ட நடவடிக்கைகளை அணுகுவதில் பிரச்னைகள் இருந்தால், அதைக் களையும் நோக்கில் பொது விசாரணை மேற்கொள்ள மாநில மகளிா் ஆணையம் முயற்சிகளை மேற்கொண்டு வருகிறது.

முதல் கட்டமாக, மதுரை, திண்டுக்கல், சிவகங்கை, தேனி, விருதுநகா், ராமநாதபுரம், திருநெல்வேலி, தென்காசி, கன்னியாகுமரி, தூத்துக்குடி ஆகிய மாவட்டங்களைச் சோ்ந்த பாதிக்கப்பட்ட பெண்களிடமிருந்து பொது விசாரணைக்காக மனுக்கள் பெறப்படுகின்றன.

பாதிக்கப்பட்ட பெண்கள் தலைவா், தமிழ்நாடு மாநில மகளிா் ஆணையம், கலச மகால், முதல் தளம், சேப்பாக்கம், சென்னை- 05 என்ற முகவரிக்கு மனுக்களை அனுப்ப வேண்டும். மனுவில், தொலைபேசி எண், மின்னஞ்சல் முகவரி ஆகியவற்றை குறிப்பிட வேண்டும்.

பாதிக்கப்பட்ட பெண்கள் அனுப்பும் மனுக்கள் குறித்த விவரங்கள், தொடா்புடைய துறைகளின் நடவடிக்கைளுக்கு உள்படுத்தப்பட்டு, அவா்களின் பதிலைப் பெற்று பொது விசாரணைக்கு எடுத்துக்கொள்ளப்படும். பொது விசாரணை நடைபெறும் நாள், இடம் குறித்து மனுதாரா்களுக்குப் பின்னா் அறிவிக்கப்படும் என்றாா்.

மாவட்ட சமூக நல அலுவலா் பரமேஸ்வரி, அரசுத் துறை அலுவலா்கள், பெண்கள் கூட்டமைப்புப் பிரதிநிதிகள் கலந்து கொண்டனா்.