சிவகங்கை மாவட்டம், காரைக்குடியில் சி.பி.எஸ்.இ. பள்ளிகளுக்கிடையே 17 மற்றும் 19 வயதுக்குள்பட்டோருக்கு மாநில அளவிலான கால்பந்து மற்றும் கோ-கோ விளையாட் டுப் போட்டிகள் வரும் செப்டம்பர் 18-ஆம் தேதி தொடங்கி 25-ஆம் தேதி வரை நடைபெறவுள்ளது.
இதுகுறித்து போட்டிகளை நடத்தும் காரைக்குடி செல்லப்பன் வித்யா மந்திர் பள்ளி தாளாளர் செ. சத்யன் சார்பில் பள்ளியின் கல்வி ஆலோசகர் ஷீலா, பள்ளி முதல்வர் சிவகுமார் ஆகியோர் வியாழக்கிழமை செய்தியாளர்களிடம் கூறியதாவது:
தமிழ்நாடு, புதுச்சேரி மற்றும் அந்தமான் ஆகிய 3 மாநிலங்களிலிருந்து கால்பந்து மற்றும் கோ-கோ விளையாட்டுப் போட்டிகளில் பங்கேற்கின்றனர். இதுவரை 3,465 வீரர் மற்றும் வீராங்கனைகள் தங்களது பெயர்களை பதிவு செய்துள்ளனர். கால்பந்துப் போட்டிகள் செப்டம்பர் 18-ஆம் தேதி தொடங்கி 21-ஆம் தேதி வரை நடைபெறுகிறது. இதற்காக செல்லப்பன் வித்யா மந்திர் பள்ளி, அழகப்பா பல்கலைக்கழக உடற்கல்வித்துறை கல்லூரி மைதானம் 1, 2, பவநகர் விளையாட்டு அரங்கம், வேலங்குடி புளுஸ், கண்டனூர் பாலையூர்,அழகப்பா மெட்ரிகுலேசன் ,கோவிலூர் ஆண்டவர் உடற்பயிற்சி கல்லூரி மைதானம் என 8 மைதானங்களில் போட்டிகள் நடத்த ஏற்பாடு செய்யப்பட்டுள்ளது. செப்டம்பர் 23-ஆம் தேதி முதல் 25-ஆம் தேதி வரை கோ-கோ விளையாட்டுப் போட்டிகள் செல்லப்பன் வித்யா மந்திர் பள்ளி மைதானத்தில் நடைபெறும். வெற்றி பெறும் அணிகளுக்கு சுழற் கேடயங்கள் வழங்கப்படும் என்று தெரிவித்தனர்.
பேட்டியின்போது பள்ளியின் துணை முதல்வர்கள் வெங்கட்ரமணன், அருள்பிரபாகர் மற்றும் அலுவலர்கள் உடனிருந்தனர்.