காவிரி மேலாண்மை வாரியம் அமைக்க வலியுறுத்தி தொடர் போராட்டம் நடத்தி வரும்  விவசாயிகளுக்கு வணிகர் சங்கங்களின் ஆதரவு தொடரும் என தமிழ்நாடு வணிகர் சங்கங்களின் பேரமைப்பின்  மாநிலத் தலைவர் ஏ.எம்.விக்கிரமராஜா தெரிவித்தார்.
சிவகங்கையில் ஞாயிற்றுக்கிழமை நடைபெற்ற வணிகர் சங்கங்களின் பேரமைப்பின் 3-ஆம் ஆண்டு விழாவில் பங்கேற்க வந்த அவர் செய்தியாளர்களிடம் கூறியது:
 தமிழ்நாடு வணிகர் சங்கங்களின் பேரமைப்பின் மாநில மாநாடு வரும் மே 5 ஆம்  தேதி சென்னையில் நடைபெற  உள்ளது. இந்த மாநாட்டில் பல்வேறு அரசியல் கட்சியின் தலைவர்கள் கலந்து கொள்ள உள்ளனர்.
 ஜிஎஸ்டி வரிவிதிப்பில் உள்ள குழப்பங்களை நீக்கி வணிகர்களுக்கு விதிக்கப்படும் வரியை முறைப்படுத்த மத்திய, மாநில அரசுகள் முன் வர வேண்டும். மேலும், பெட்ரோல், டீசல் விலையை குறைக்க வேண்டும். காவிரி  மேலாண்மை வாரியம் அமைக்க வலியுறுத்தி தொடர் போராட்டம் நடத்தி வரும் விவசாயிகளுக்கு வணிகர் சங்கங்களின் ஆதரவு தொடரும் என்றார்.