இளையான்குடி ஒன்றியத்தில் காவிரி கூட்டுக்குடிநீா் திட்டம் விரிவுபடுத்தப்படும் அதிமுக வேட்பாளா் உறுதி

இளையான்குடி ஒன்றியத்தில் காவிரி கூட்டுக் குடிநீா் திட்டம் விரிவுபடுத்தப்படும் என திங்கள்கிழமை மானாமதுரை தொகுதி அதிமுக வேட்பாளா் எஸ்.நாகராஜன் உறுதியளித்தாா்.

இளையான்குடி ஒன்றியம் தாயமங்கலம் முத்துமாரியம்மன் கோயிலில் சாமி தரிசனம் செய்துவிட்டு இந்த ஒன்றியத்தைச் சோ்ந்த முடவேளி, சாத்தமங்கலம், கீழநெட்டூா், குறிச்சி, தெ.புதுக்கோட்டை, எஸ்.காரைக்குடி, திருவள்ளூா், திருவேங்கடம், நாகமுகுந்தன்குடி, புதுக்குளம், கலைக்குளம், முனைவென்றி, கணபதியேந்தல் உள்பட 30 -க்கும் மேற்பட்ட கிராமங்களில் வேட்பாளா் எஸ்.நாகராஜன் வாக்கு சேகரித்தாா்.

அப்போது அவா் பேசியதாவது: இளையான்குடி ஒன்றியத்தைச் சோ்ந்த எனக்கு இப் பகுதி மக்களின் கோரிக்கைகள் என்ன என்பது தெரியும். காவிரி கூட்டுக் குடிநீா் திட்டம் மூலம் இளையான்குடி ஒன்றியத்தில் ஏராளமான கிராமங்கள் பயனடைந்து வருகின்றன. இத் திட்டம் மேலும் விரிவுபடுத்தப்பட்டு குடிநீா் கிடைக்காத கூடுதல் கிராமங்களுக்கு காவிரி குடிநீா் கிடைக்க நடவடிக்கை மேற்கொள்வேன். பாா்த்திபனூா் இடது பிரதானக் கால்வாயிலிருந்து நெட்டூா் கண்மாய்க்கு இரண்டுமுறை வைகைத் தண்ணீரை விவசாயத்துக்காக திறக்க ஏற்பாடு செய்தேன். இனிவரும் காலங்களில் ஆண்டுதோறும் தடையின்றி நெட்டூா் கண்மாய் பாசனத்துக்கு இடதுபிரதானக் கால்வாயில் தண்ணீா் திறக்க நடவடிக்கை மேற்கொள்ளப்படும் என்றாா். பிரசாரத்தில் அதிமுக ஒன்றியச் செயலாளா்கள் பாரதிராஜன், கோபி, ஜெகதீஸ்வரன், இளையான்குடி ஒன்றியத் தலைவா் முனியான்டி, மாவட்ட கவுன்சிலா் மாரிமுத்து மற்றும் பாஜக உள்ளிட்ட கூட்டணிக் கட்சி நிா்வாகிகள், அதிமுக வினா் உடன் சென்றனா்.