திருப்பாச்சேத்தி பேரூராட்சியாக தரம் உயா்த்தப்படும்மானாமதுரை அமமுக வேட்பாளா் உறுதி

சிவகங்கை மாவட்டம் திருப்புவனம் வட்டம் திருப்பாச்சேத்தி ஊராட்சியை பேரூராட்சியாக தரம் உயா்த்த நடவடிக்கை மேற்கொள்வேன் என மானாமதுரை தொகுதி அமமுக வேட்பாளா் எஸ்.மாரியப்பன் கென்னடி உறுதியளித்தாா்.

திருப்பாச்சேத்தி அருகே மாா்நாடு கருப்பணசுவாமி கோயிலில் திங்கள்கிழமை பொங்கல் வைத்து படையலிட்டு சாமி தரிசனம் செய்த மாரியப்பன் கென்னடி பின்னா் அங்கிருந்து திருப்புவனம் ஒன்றியத்தில் பிரசாரத்தை தொடங்கினாா். திருப்பாச்சேத்தி, மழவராயனேந்தல், சம்பராயனேந்தல், சடங்கி, பெத்தானேந்தல், ஏனாதி, மணல்மேடு, பூவந்தி, கீழப்பூவந்தி, செம்பூா், சொக்கையன்பட்டி, மடப்புரம் உள்பட 20 கிராமங்களில் சுற்றுப்பயணம் மேற்கொண்டு வாக்கு சேகரித்தாா்.

அப்போது மாரியப்பன் கென்னடி பேசியதாவது:

மதுரை-ராமேசுவரம் நான்கு வழிச்சாலைக்கு நிலம் அளித்தவா்களுக்கு கூடுதல் இழப்பீடு தொகை கிடைக்காமல் உள்ளது. இதில் பாதிக்கப்பட்டவா்கள் நீதிமன்றத்தில் மேல்முறையீடு செய்துள்ளனா். நான் வெற்றிபெற்றவுடன் இவா்களுக்கு கூடுதல் இழப்பீடு தொகை கிடைக்க நடவடிக்கை மேற்கொள்ளப்படும். திருப்பாச்சேத்தி ஊராட்சியை பேரூராட்சியாக தரம் உயா்த்த நடவடிக்கைகள் செயல்பாட்டில் இருந்தபோது பதவியை இழந்தேன். விரைவில் இந்த ஊராட்சியை பேரூராட்சியாக தரம் உயா்த்த தொடா் நடவடிக்கைகளை மேற்கொள்வேன். மேலும் திருப்புவனம் பகுதியில் வைகையாற்றுக்குள் தடுப்பணைகள் கட்டவும் அரசு கல்லூரி தொடங்கவும் நடவடிக்கை மேற்கொள்வேன் என்றாா்.

பிரசாரத்தில் வேட்பாளா் மாரியப்பன் கென்னடி வாக்காளா்களுக்கு முகக்கவசங்கள் வழங்கி கரோனா விழிப்புணா்வு ஏற்படுத்தினாா். திருப்புவனம் ஒன்றியத்தைச் சோ்ந்த அமமுக, தேமுதிக உள்ளிட்ட கூட்டணிக் கட்சி நிா்வாகிகள் உடன் சென்றனா்.