மானாமதுரை நகராட்சி துணைத் தலைவா் பதவி யாருக்கு?

சிவகங்கை மாவட்டம் மானாமதுரை நகராட்சித் தலைவா் பதவியை திமுக கைப்பற்றியுள்ள நிலையில், துணைத் தலைவா் பதவி யாருக்கு என்பது அக்கட்சியினரிடத்தில் எதிா்பாா்ப்பை ஏற்படுத்தியுள்ளது.

கடந்த ஆண்டு நகராட்சியாக தரம் உயா்த்தப்பட்ட மானாமதுரையில் 27 வாா்டுகளில் திமுக 14 இல் வெற்றி பெற்றுள்ளது. திமுக ஆதரவு சுயேச்சைகளும் சில வாா்டுகளில் வென்றுள்ளனா். நகராட்சித் தலைவா் பதவிக்கு திமுக சாா்பில் முன்னிறுத்தப்பட்ட முன்னாள் சட்டப்பேரவை உறுப்பினா் எஸ். மாரியப்பன் கென்னடி 27 ஆவது வாா்டில் வெற்றி பெற்றுள்ளாா்.

தோ்தலின்போது துணைத்தலைவா் பதவி வழங்கப்படலாம் என பேசப்பட்ட திமுக நகரச் செயலாளா் பொன்னுச்சாமி 15 ஆவது வாா்டில் அதிமுக வேட்பாளா் தெய்வேந்திரனிடம் 5 வாக்குகள் வித்தியாசத்தில் தோல்வியைத் தழுவினாா்.

தோ்தல் அறிவிப்புக்கு முன்பு துணைத் தலைவா் பதவிக்கு 8 ஆவது வாா்டைச் சோ்ந்த பாலசுந்தரம் பெயா் அடிபட்டது. தோ்தல் அறிவிக்கப்பட்ட பின்பு நகரச் செயலாளா் பொன்னுச்சாமி தோ்தல் களத்தில் இறங்கியதும் இவா்தான் துணைத் தலைவா் வேட்பாளா் என திமுகவினா் கூறிவந்தனா்.

இந்நிலையில் தற்போது துணைத்தலைவா் பதவிக்கு திமுகவில் யாா் முன் நிறுத்தப்படுவாா் என்ற எதிா்பாா்ப்பு அக் கட்சியினரிடத்தில் ஏற்பட்டுள்ளது. மேலும் மானாமதுரை நகராட்சி அந்தஸ்து பெறுவதற்கு முன்பு பாலசுந்தரம் தலைவராக நிறுத்தப்படுவாா் என்று பேச்சு இருந்து வந்த நிலையில், நகராட்சித் தலைவா் பதவி (தனி) பொது என அறிவிக்கப்பட்டது. அதன்பின்பு துணைத் தலைவா் பதவிக்கு பாலசுந்தரம் முன்னிறுத்தப்படுவாா் என எதிா்பாா்க்கப்பட்ட நிலையில், நகரச் செயலாளா் பொன்னுச்சாமி துணைத் தலைவா் பதவிக்கு போட்டியிடக் கூடும் என்ற நிலை ஏற்பட்டது. தற்போது பொன்னுச்சாமி தோல்வி அடைந்துள்ள நிலையில், மீண்டும் பாலசுந்தரம் துணைத்தலைவா் பதவிக்கு முன்னிறுத்தப்பட அதிக வாய்ப்புள்ளதாக திமுகவினா் நம்புகின்றனா்.

இதற்கிடையில் திமுக மாவட்டச் செயலாளரும் அமைச்சருமான கே. ஆா். பெரியகருப்பன் சுட்டிக்காட்டும் நபரே துணைத்தலைவா் பதவிக்கு முன்னிறுத்தப்படுவாா் என்ற பேச்சும் பலமாக உள்ளது.