மானாமதுரை: சிவகங்கை மாவட்டம் மானாமதுரை அருகே அ.விளாக்குளம் கிராமத்தில் நடந்த கோயில் திருவிழாவையொட்டி வெள்ளிக்கிழமை கிடா முட்டு சண்டைப் போட்டி நடைபெற்றது. 

அ.விளாக்குளம் கிராமத்தில் உள்ள நிறைகுளத்து அய்யனார் கோயில் புரவி எடுப்பு விழாவை முன்னிட்டு மாட்டு வண்டிப் பந்தயம், வடமாடு மஞ்சுவிரட்டு நடத்தப்பட்டது. இதன் தொடர்ச்சியாக நடைபெற்ற கிடா முட்டு சண்டை போட்டியை  மானாமதுரை சட்டமன்ற உறுப்பினர் தமிழரசி தொடங்கி வைத்தார்.  

இதையும் படிக்க: மன்னார்குடியில் முன்னாள் அமைச்சர் ஆர்.காமராஜ் வீட்டில் சோதனை: அதிமுகவினர் ஆர்ப்பாட்டம்

பல்வேறு மாவட்டங்களிலிருந்தும் கொண்டுவரப்பட்டிருந்த நூற்றுக்கும் மேற்பட்ட கிடாக்கள் போட்டியில் பங்கேற்றன. போட்டிக்கான களத்தில் நேருக்கு நேர் கிடாக்கள் மோதி சண்டையிட்டன. அதிக முறை முட்டிக்கொண்ட கிடாக்களுக்கு வெற்றி பகிர்ந்தளிக்கப்பட்டது. எதிரில் நின்று களமாடிய கிடாவின் முட்டு தாங்காமல்  பல கிடாக்கள் ஓட்டம் பிடித்தன. 

களத்தில் கம்பீரமாக நின்று முட்டிய கிடாக்கள் வெற்றி பெற்றதாக அறிவிக்கப்பட்டது. வெற்றி பெற்ற கிடாக்களின் உரிமையாளர்களுக்கு விழாக்குழு சார்பில் பித்தளை அண்டா உள்ளிட்ட பரிசுகள் வழங்கப்பட்டது. 

கிடா முட்டு சண்டை போட்டியைக் காண மைதானத்தைச் சுற்றி ஏராளமான ரசிகர்கள் திரண்டிருந்தனர். போட்டிக்கான ஏற்பாடுகளை விழா குழுவினர் செய்திருந்தனர். புரவி எடுப்பு திருவிழாவை முன்னிட்டு நாளை (சனிக்கிழமை)  விளாக்குளத்தில் கபடி போட்டி நடைபெறுகிறது.