தேனி மாவட்டம் கம்பம் உழவா் சந்தை அருகில் தெருவோரக் கடைகள் வைத்தால் கடும் நடவடிக்கை எடுக்கப்படும் என்று நகராட்சி நிா்வாகத்தினா் அறிவித்துள்ளனா்.

கம்பம் உழவா் சந்தை அருகே கரோனா தொற்று பரவல் அதிகம் இருந்ததால் அந்த பகுதியைச் சுற்றி ‘சீல்’ வைக்கப்பட்டது. அதனால் உழவா்சந்தை ஒழுங்குமுறை விற்பனைக்கூட வளாகத்திற்கு மாற்றப்பட்டது. ஆனால் அந்த பகுதியைச்சுற்றிலும், தெருவோரக் கடைக்காரா்கள் தடுப்புகளை உடைத்து கடைகள் அமைத்தனா். இதனால் நகராட்சி நிா்வாகத்தினா் தெற்கு காவல் நிலைய போலீஸாருடன் சென்று கடைகளை அகற்றினா். ஆனால் அதையும் மீறி சிலா் கடைகளை அமைத்து வருகின்றனா்.

இதைத்தொடா்ந்து நகராட்சி வருவாய் ஆய்வாளா் பி.குமாா் தலைமையிலான ஊழியா்கள் தெருவோரக்கடை வியாபாரிகளை எச்சரித்து கடைகளை அகற்றச்செய்தனா்.

உழவா் சந்தை: கம்பம் உத்தமபாளையம் சாலையில், ஒழுங்குமுறை விற்பனைக்கூட வளாகத்திற்குள் இடமாற்றம் செய்யப்பட்ட உழவா் சந்தையில், தற்போது சராசரியாக நாளொன்றுக்கு, 17 டன் காய்கறிகள் வரத்து உள்ளது. இதில் 38 கடைகள் அமைக்கப்பட்டுள்ளன. மேலும் கடைகள் அமைக்க இடம் உள்ளது. இதை உழவா் சந்தை விவசாயிகள் பயன்படுத்திக்கொள்ள வேண்டும் என்று நிா்வாக அலுவலா் கண்ணதாசன் தெரிவித்தாா்.