விருதுநகர் மாவட்டம், ஸ்ரீவில்லிபுத்தூர் அருகே போலி மருத்துவர் செவ்வாய்க்கிழமை கைது செய்யப்பட்டார்.
வத்திராயிருப்பு அருகேயுள்ள சுரைக்காய்பட்டியில் ராஜேந்திரன் (42) என்பவர், மருத்துவம் படிக்காமல் ஆங்கில முறையில் பொதுமக்களுக்கு ஊசி போட்டும், மருந்துகள் வழங்கியும் சிகிச்சை அளித்து வந்துள்ளார். இது குறித்து, விருதுநகரில் உள்ள மருத்துவத் துறைக்கு புகார்கள் வந்துள்ளன.
அதனடிப்படையில், சுகாதாரத் துறையினர் செவ்வாய்க்கிழமை மாலை அங்கு சென்று சோதனையிட்டனர். அப்போது, ராஜேந்திரன் உரிய மருத்துவப் படிப்பு படிக்காமலேயே  கிராம மக்களுக்கு வைத்தியம் பார்த்து வந்தது தெரியவந்தது. அதையடுத்து, அவரைக் கைது செய்து,  மருத்துவம் பார்க்க பயன்படுத்திய உபகரணங்கள், மருந்துகளை அதிகாரிகள் பறிமுதல் செய்து, நத்தம்பட்டி காவல் நிலையத்தில் ஒப்படைத்தனர். இது குறித்து போலீஸார் வழக்குப் பதிவு செய்து ராஜேந்திரனை கைது செய்து விசாரித்து வருகின்றனர்.