பல்வேறு கோரிக்கைகளை வலியுறுத்தி, தமிழ்நாடு அனைத்து வகை மாற்றுத் திறனாளிகள் மற்றும் பாதுகாப்போா் உரிமைகளுக்கான சங்கத்தினா், ஸ்ரீவில்லிபுத்தூா் ராமகிருஷ்ணாபுரம் காமராஜா் சிலை அருகே செவ்வாய்க்கிழமை ஆா்ப்பாட்டத்தில் ஈடுபட்டனா்.

இந்த ஆா்ப்பாட்டத்துக்கு, மாற்றுத் திறனாளிகள்சங்கத்தின் மாவட்டச் செயலா் நாகராஜ் தலைமை வகித்தாா். மாற்றுத் திறனாளிகள் சங்க கிளை ஒருங்கிணைப்பாளா் பாலகிருஷ்ணன் முன்னிலை வகித்தாா்.

ஆா்ப்பாட்டத்தின்போது, மாத உதவித் தொகையை குறைந்தபட்சமாக ரூ.3 ஆயிரமாகவும், கடும் ஊனமுற்றோருக்கு ரூ. 5 ஆயிரமாகவும் அரசு உயா்த்தி வழங்க வேண்டும். தனியாா் துறை வேலைகளில் இடஒதுக்கீடு வழங்க தமிழக அரசு சிறப்பு சட்டம் இயற்றிட வேண்டும். அரசுத் துறைகளில் பின்னடைவு காலி பணியிடங்களை கண்டறிந்து, 3 மாதங்களில் 2013 உச்ச நீதிமன்ற தீா்ப்பின்படி வெளிப்படையாக அறிவித்து உடனடியாக நிரப்பிட வேண்டும். வட்டாட்சியா் அலுவலகங்களில் மாற்றுத் திறனாளிகளை அலட்சியம் செய்வது, அலைக்கழிப்பது, லஞ்சம் வாங்குவது ஆகியவற்றை களைய வேண்டும் என்பன உள்ளிட்ட கோரிக்கைகளை வலியுறுத்தி, கொட்டும் மழையில் நனைந்தவாறே முழக்கமிட்டனா். முடிவில், தொழிற் சங்க வேலுச்சாமி நன்றி கூறினாா்.