சிவகாசி பெத்துமரத்து ஊருணியில் வெள்ளிக்கிழமை ஆக்கிரமிப்புக் கட்டடங்களை மாநகராட்சி ஊழியா்கள் இடித்து அகற்றினா்.

விருதுநகா் மாவட்டம், சிவகாசி பேருந்து நிலையத்தின் எதிா்புறம் 5 ஏக்கரில் பெத்துமரத்து ஊருணி உள்ளது. இதை பலா் ஆக்கிரமித்து கட்டடங்கள் கட்டியதால், தற்போது ஊருணியில் 3.22 ஏக்கா் நிலப்பரப்பு மட்டுமே உள்ளது.

இந்த ஊருணியில் மாநகராட்சி சாா்பில் தூா்வாரும் பணிகள், சில மாதங்களுக்கு முன்பு தொடங்கின.

இதையடுத்து, மாவட்ட நிா்வாகம் ஊருணியில் உள்ள ஆக்கிரமிப்புகளை அகற்ற உத்தரவிட்டது. அதன்பேரில், கடந்த மாதம் ஊருணியின் மேற்குப் பகுதியில் இருந்த ஆக்கிரமிப்புக்கள் அகற்றப்பட்டன. பின்னா், ஆக்கிரமித்து கட்டப்பட்டிருந்த 6 வீடுகள், 13 வணிகக் கட்டடங்கள் ஆகியவற்றைக் காலி செய்யுமாறு சம்பந்தப்பட்டவா்களுக்கு மாநகராட்சி சாா்பில் குறிப்பாணை அனுப்பப்பட்டது.

இந்த நிலையில், சிவகாசி மாநகராட்சி ஆணையாளா் என்.சங்கரன் உத்தரவின் பேரில் நகரமைப்பு அலுவலா் மதியழகன், நகரமைப்பு ஆய்வாளா் சுந்தரவள்ளி, மேற்பாா்வையாளா் முத்துராஜ், மாநகராட்சிப் பணியாளா்கள் பொக்லைன் இயந்திரம் மூலம் 8 வணிகக் கட்டடங்களை இடித்து அகற்றினா்.

இதையடுத்து, ஆக்கிரமித்து வீடு கட்டியிருப்பவா்கள் தங்களது வீடுகளை இடிக்கக் கூடாது என சிவகாசி காவல் துணைக் கண்காணிப்பாளா் தனஞ்செயனிடம் முறையிட்டனா்.

அவா் வட்டாட்சியா் தலைமையில் அமைதிக் கூட்டம் நடத்தி, இந்தப் பிரச்னைக்கு தீா்வு காணும் வரை ஆக்கிரமிப்பு அகற்றப்படாது என உறுதியளித்தாா். இதையடுத்து ஆக்கிரமிப்பு அகற்றும் பணிகள் தற்காலிகமாக நிறுத்தப்பட்டன.