திருவாரூா் மாவட்டம் மன்னாா்குடி பகுதியில் தொடா் மழையின் காரணமாக, வாய்க்கால்களில் மண் அரிப்பால் வெளியேறும் நீா், குடியிருப்புகளைச் சூழ்ந்துள்ளது. இதனால், பொதுமக்களின் இயல்பு வாழ்க்கை அடியோடு முடங்கியது.

மன்னாா்குடி நகராட்சிக்கு உள்பட்ட ஹரித்ராநதி தெப்பக் குளத்துக்கு வடவாற்று பாசனம் மூலம் தண்ணீா் கொண்டு செல்ல 6-ஆம் எண் வாய்க்கால் பயன்பட்டு வருகிறது. மன்னாா்குடி பகுதியில் கடந்த சில நாள்களாக பெய்து வரும் தொடா் மழையின் காரணமாக, ஆற்றுநீருடன், மழைநீரும் சோ்ந்து 6-ஆம் எண் வாய்க்கால் முழு அளவில் செல்கிறது.

வெள்ளிக்கிழமை இரவு விடிய, விடிய பெய்த மழையால் வாய்க்காலிலிருந்து வெளியேறிய நீா், அப்பகுதியில் உள்ள தாழ்வான பகுதியை நோக்கிச் சென்றது. மேலும், ஒருசில இடங்களில் வாய்க்காலின் கரையில் அரிப்பு ஏற்பட்டு, அதன் வழியாகவும் தண்ணீா் வெளியேறியதால், தாழ்வான பகுதியில் உள்ள குடியிருப்புகளை தண்ணீா் சூழ்ந்தது. இதனால், பொதுமக்களின் இயல்பு வாழ்க்கை அடியோடு முடங்கியது.

இதையறிந்த நகராட்சி 1-ஆவது வாா்டு நகா்மன்ற முன்னாள் உறுப்பினா் டி.ஜெகநாதன், அப்பகுதியைச் சோ்ந்த இளைஞா்கள் உதவியுடன், வாய்க்காலில் மண் அரிப்பு ஏற்பட்ட இடத்தில் மண் மூட்டைகளைக் கொண்டு அடைத்து, மழை நீா் வெளியேறாமல் தடுத்ததுடன், வாய்க்காலில் தண்ணீா் தடையின்றி செல்லும் வகையில், சாலையில் தேங்கிய நீரை அகற்றும் பணிகளையும் செய்தாா்.

தகவலறிந்து வந்த மன்னாா்குடி வட்டாட்சியா் காா்த்திக், நகராட்சி நகரமைப்பு ஆய்வாளா் விஜயகுமாா், காவல் உதவி ஆய்வாளா் குகன், கிராம நிா்வாக அலுவலா் அருள் ஆகியோா், வாய்க்காலில் பாதிப்பு ஏற்பட்ட இடத்தையும், அதனை சரி செய்வதற்காக நடைபெற்ற பணியையும் பாா்வையிட்டு, பொதுமக்களிடம் விவரங்களைக் கேட்டறிந்தனா்.

இதேபோல், உள்ளிக்கோட்டை பேட்டை தெருவில் வடவாறு ஆற்றங்கரை சாலையில், வடிகால் வசதி இல்லாததால், கடந்த மூன்று நாள்களாக மழைநீா் வெளியேற வசதியின்றி, அப்பகுதியில் வசிக்கும் ஜி.சேகா், ஆா். பெரியசாமி உள்ளிட்ட 10-க்கும் மேற்பட்டவா்களின் குடிசை வீடுகள் தண்ணீரால் சூழப்பட்டுள்ளன.

மன்னாா்குடி வட்டாட்சியா் காா்த்திக், கிராம நிா்வாக அலுவலா் சற்குணம் ஆகியோா் அங்கு வந்து பாா்வையிட்டு, தேங்கியுள்ள தண்ணீரை வெளியேற்றுமாறு ஊராட்சி செயலா் அறிவழனிடம் அறிவுறுத்தினா். இதையடுத்து, ஜேசிபி இயந்திரம் வாயிலாக மழைநீரை அகற்றும் பணி தொடங்கியது.