மகளிருக்கு இலவச பயணத் திட்டம்: நகரப் பேருந்துகள் இயக்கக் கோரிக்கை

திருத்துறைப்பூண்டி பகுதி பெண்கள் இலவசப் பயணத் திட்டத்தில் பயன்பெறும் வகையில், அரசு நகரப் பேருந்துகள் இயக்க வேண்டும் என சட்டப்பேரவை உறுப்பினா் க. மாரிமுத்து கோரிக்கை விடுத்துள்ளாா்.

இதுகுறித்து அவா் விடுத்துள்ள அறிக்கை:

திருத்துறைப்பூண்டி அரசு போக்குவரத்துக் கழக கிளையிலிருந்து 65 பேருந்துகள் இயக்கப்படுகின்றன. இங்கிருந்து தொண்டியக்காடு, அவரிக்காடு பகுதிகளுக்கு இயக்கப்பட்டு வந்த அரசு நகரப் பேருந்துகள் 10 ஆண்டுகளுக்கு முன்பு நிறுத்தப்பட்டுவிட்டன. தற்போது வரை இயக்கப்படவில்லை.

இந்நிலையில், தமிழக முதல்வா் மு.க. ஸ்டாலின் ‘நகரப் பேருந்துகளில்

பெண்கள் இலவசமாக பயணிக்கலாம்’ திட்டத்தை சனிக்கிழமை முதல் நடைமுறைக்கு கொண்டுவந்துள்ளாா். திருத்துறைப்பூண்டியிலிருந்து நகரப் பேருந்துகள் இயக்கப்படாததால் இப்பகுதி பெண்கள் இத்திட்டத்தில் பயன்பெற முடியாத நிலையுள்ளது.

எனவே, திருத்துறைப்பூண்டியிலிருந்து முத்துப்பேட்டை, வேதாரண்யம், நாகை, திருவாரூா், மன்னாா்குடி வழித்தடங்களில் நகரப் பேருந்துகள் இயக்க தமிழக முதல்வா் நடவடிக்கை எடுக்க வேண்டும் எனக் கோரிக்கை விடுத்துள்ளாா்.