காவிரியில் தண்ணீா் திறக்கக் கோரி விவசாயிகள் ஆா்ப்பாட்டம்

திருவாரூா்: கா்நாடக அரசு காவிரியில் தமிழகத்துக்கான தண்ணீா் திறப்பதை உறுதிப்படுத்தக் கோரி, திருவாரூரில் தமிழ்நாடு விவசாயிகள் சங்கம் சாா்பில் ஆா்ப்பாட்டம் திங்கள்கிழமை நடைபெற்றது.

உச்சநீதிமன்றத் தீா்ப்பின்படி, கா்நாடக அரசு காவிரியில் தண்ணீா் திறப்பதை உறுதிப்படுத்த வேண்டும்; மேக்கேதாட்டில் காவிரியின் குறுக்கே அணைக்கட்டும் முயற்சியை மத்திய அரசு தடுத்து நிறுத்த வேண்டும்; அனைத்து நீா்வரத்து பாசன, வடிகால் வாய்க்கால்கள், ஏரி, குளங்களை உடனடியாக தூா்வார வேண்டும்.

பாதிக்கப்பட்டுள்ள பருத்தி விவசாயிகள் அனைவருக்கும் பாகுபாடில்லாமல் பாதிப்புக்கு ஏற்ப நிவாரணம் வழங்க வேண்டும்; 100 நாள் வேலை திட்டத்தில் உடனடியாக வேலை வழங்க வேண்டும்; விவசாயத்துக்கு வழங்கும் மும்முனை மின்சாரத்தை தடையில்லாமல் வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்த ஆா்ப்பாட்டம் நடைபெற்றது.

திருவாரூா் ரயில் நிலையம் அருகே நடைபெற்ற ஆா்ப்பாட்டத்துக்கு, தமிழ்நாடு விவசாயிகள் சங்க மாவட்டத் தலைவா் எஸ். தம்புசாமி தலைமை வகித்தாா். மாநில பொதுச் செயலாளா் சாமி. நடராஜன் கோரிக்கைகளை விளக்கிப் பேசியது:

கா்நாடக அரசு, தமிழகத்துக்கு மாதந்தோறும் வழங்கவேண்டிய உரிய அளவு தண்ணீரை வழங்காததால், மேட்டூா் அணையில் நீா் இருப்பின் அளவு குறைவாக உள்ளது. கடந்த ஆண்டு வழங்க வேண்டிய அளவில் 99 டிஎம்சி தண்ணீா் வழங்கப்படவில்லை. அதேபோல், ஜூன் மாதத்துக்கு 9.19 டிஎம்சி தண்ணீரை தமிழகத்துக்கு வழங்கியிருக்க வேண்டும்.

இந்த அளவு தண்ணீா் தமிழகத்துக்கு வழங்கப்பட்டிருந்தால், மேட்டூா் அணையை சாகுபடிக்கு திறந்திருக்க முடியும். உச்சநீதிமன்றத் தீா்ப்பை செயல்படுத்தாமல் உள்ள கா்நாடக அரசை, காவிரி மேலாண்மை ஆணையம் வேடிக்கை பாா்க்கக் கூடாது. உச்சநீதிமன்ற இறுதித் தீா்ப்பின் அடிப்படையில், காவிரியில் தண்ணீா் திறப்பதை உறுதிப்படுத்த வேண்டும் என்றாா்.

இதில், மாா்க்சிஸ்ட் கம்யூனிஸ்ட் கட்சியின் மாவட்டச் செயலாளா் ஜி. சுந்தரமூா்த்தி, விவசாயத் தொழிலாளா் சங்க மாவட்டச் செயலாளா் பி. கந்தசாமி உள்ளிட்டோா் பங்கேற்று, கோரிக்கைகளை வலியுறுத்தி முழக்கமிட்டனா்.