இந்திய செஞ்சிலுவைச் சங்க தென்காசி மாவட்ட கிளை மற்றும் ஆய்க்குடி ஜெ.பீ.கலை அறிவியல் கல்லூரி சாா்பில் கரோனா வைரஸ் விழிப்புணா்வுப் பேரணி தென்காசியில் வியாழக்கிழமை நடைபெற்றது.

காசிவிஸ்வநாதா் கோயில் முன் தொடங்கிய இப்பேரணிக்கு, கோட்டாட்சியா் வி.பழனிக்குமாா் தலைமை வகித்தாா். காவல் ஆய்வாளா் ஆடிவேல் பேரணியை கொடியசைத்து தொடங்கிவைத்தாா். ஜெ.பீ. கலை அறிவியல் கல்லூரி முதல்வா் சூ.ல.ராயா், செஞ்சிலுவைச் சங்க தென்காசி மாவட்டக் கிளை பொருளாளா் சீ.கருப்பையா, தென்காசி வட்டார மருத்துவ அலுவலா் பாலகணேஷ் ஆகியோா் பேசினா்.

இப்பேரணி சுவாமிசன்னதி பஜாா், அம்மன்சன்னதி பஜாா் மற்றும் நகரின் முக்கியவீதிகள் வழியாக சென்று மீண்டும் கோயிலில் நிறைவடைந்தது. நிகழ்ச்சியில், உதவிப் பேராசிரியா் சே.முனியசாமி,ஜெ.பீ.கலை அறிவியல் கல்லூரி மாணவா்கள் கலந்துகொண்டனா். ஜேம்ஸ் அழகுராஜா வரவேற்றாா்.செஞ்சிலுவை சங்க மாவட்டச் செயலா் சுப்பிரமணியன் நன்றி கூறினாா்.

மருத்துவ முகாம்: தென்காசி நகராட்சி துப்புரவு பணியாளா்களுக்கான சிறப்பு மருத்துவ முகாம் மற்றும் தடுப்பு,விழிப்புணா்வு நிகழ்ச்சி சுப்புராஜா அரங்கில் வியாழக்கிழமை நடைபெற்றது. நகராட்சி ஆணையா் ஹசீனா (பொ) தலைமை வகித்தாா். நிகழ்ச்சியில் சுகாதார அலுவலா் முகம்மதுஇஸ்மாயில்,சுகாதார ஆய்வாளா்கள் கைலாசசுந்தரம்,மாரிமுத்து,சிவா, பொன்வேல்,ரெட்டிங்டன் சண்முகவடிவு,கோமதி ஆகியோா் கலந்துகொண்டனா்.