தென்காசியில் நடைபெற்ற மக்கள் குறைதீா் முகாமில் 7 பயனாளிகளுக்கு ரூ. 1.14 லட்சத்தில் நலத்திட்ட உதவிகள் வழங்கப்பட்டன.

தென்காசி மாவட்டத்தின் முதல் மக்கள் குறைதீா்க்கும் முகாம் தென்காசி கோட்டாட்சியா் அலுவலகம் எதிரே உள்ள தனியாா் திருமண மண்டபத்தில் திங்கள்கிழமை நடைபெற்றது. முகாமிற்கு மாவட்ட ஆட்சியா் அருண்சுந்தா் தயாளன் தலைமை வகித்து பொதுமக்களிடமிருந்து மனுக்களைப் பெற்றாா்.

முகாமில், கடையநல்லூா் வட்டத்தைச் சோ்ந்தவா்களுக்கு நலத்திட்ட உதவிகளை ஆட்சியா் வழங்கினாா். புதுக்குடி பகுதி 1 கிராமம், கம்பநேரியைச் சோ்ந்த ராமாத்தாள், சுதா, முருகேஸ்வரி, புஷ்பம் ஆகியோருக்கு இலவச வீட்டுமனைப் பட்டாவும், தென்னங்கன்றும் வழங்கப்பட்டது.

கொடிக்குறிச்சி சிவராமபேட்டையைச் சோ்ந்த ந. கோமதிநாயகத்திற்கு மாற்றுத்திறனாளி உதவித்தொகை, சு. மாணிக்கவாசகம் என்பவருக்கு உழவா் பாதுகாப்புத் திட்டத்தின் கீழ், ரூ. 1 லட்சத்து 2 ஆயிரத்து 500 விபத்து நிவாரண தொகைக்கான காசோலை, ஆய்க்குடி கிருஷ்ணன்கோவில் தெருவைச் சோ்ந்த பா. ரமேஷுக்கு குடும்ப அட்டை வழங்கப்பட்டது.

நிகழ்ச்சியில், மாவட்ட வருவாய் அலுவலா் கல்பனா, கோட்டாட்சியா் பழனிக்குமாா், வட்டாட்சியா்கள் ஹென்றிபீட்டா், சண்முகம், அழகப்பராஜா, ஓசானாபொ்னாண்டோ உள்ளிட்டோா் பங்கேற்றனா்.