புதுக்கோட்டை அருகே நத்தம்பண்ணை ஊராட்சியில் நிலவும் குடிநீர்த்தட்டுப்பாட்டைக் கண்டித்து, அப்பகுதி  மக்கள் காலிக்குடங்களுடன் புதன்கிழமை சாலை மறியலில் ஈடுபட்டதால், திருச்சி - புதுகை  நெடுஞ்சாலையில் சுமார் 1 மணிநேரம் போக்குவரத்து பாதிக்கப்பட்டது.
  புதுகை நகராட்சியின் அருகேயுள்ள நத்தம்பண்ணை ஊராட்சியைச் சார்ந்த கரிசல்பாறை,எம்.கே.நகர் ஆகிய பகுதிகளில் கடந்த 1 மாதமாக குடிநீர் விநியோகிக்கப்படாததால், ஆத்திரமடைந்த அப்பகுதி பெண்கள் புதன்கிழமை புதுகை - திருச்சி நெடுஞ்சாலையில் அரசு தொழிற்பயிற்சி நிலையப் பகுதியில் காலிக்குடங்களுடன் திடீர் சாலைமறியல் போராட்டத்தில் ஈடுபட்டனர்.
தகவலறிந்த திருக்கோகர்ணம் காவல் நிலைய ஆய்வாளர் பி. தமிழ்மாறன் உள்ளிட்டோர் சம்பவ இடத்துக்குச்சென்று சாலைமறியலில் ஈடுபட்ட மக்களிடம் பேச்சுவார்த்தை நடத்தியதையடுத்து அவர்கள் கலைந்து சென்றனர்.