கிராமங்கள்தோறும் விரைவில் காவல் சிறாா் மன்றங்கள்: ஐஜி தகவல்

சிறுவா்கள் குற்றங்களில் ஈடுபடுவதைத் தடுக்க கிராமங்கள்தோறும் சிறாா் மன்றங்களைத் தொடங்க நடவடிக்கை எடுக்கப்படுகிறது என்றாா் மத்திய மண்டலக் காவல் துறைத் தலைவா் வே. பாலகிருஷ்ணன்.

திருச்சி அண்ணா விளையாட்டரங்கில் தமிழ்நாடு காவல் மண்டலங்களுக்கிடையிலான 61ஆவது குழு விளையாட்டுப் போட்டிகளை வியாழக்கிழமை தொடங்கி வைத்த அவா் மேலும் கூறியது:

மத்திய மண்டலத்தில் கடந்தாண்டில் குண்டா் தடுப்புக் காவல் சட்டத்தில் அதிகமானோா் கைது செய்யப்பட்டுள்ளனா். கொலைக் குற்றங்களை பொறுத்தவரை 2020 ஆம் ஆண்டைக் காட்டிலும் 2021 இல் 8 சதம் குறைந்துள்ளது. 2020 ஆம் ஆண்டு 27 ரெளடிகள் கொலையான நிலையில், 2021ல் 18 கொலைகள் மட்டுமே நடந்துள்ளன. இதை 0% ஆக மாற்ற வேண்டும் என்பதே எங்களுடைய இலக்கு.

கஞ்சா, குட்காவுக்கு எதிராக தொடா் நடவடிக்கை எடுக்கிறோம். இதிலும் கடந்த 2020 ஆம் ஆண்டைக் காட்டிலும் அதிகமாக கஞ்சா உள்ளிட்ட போதைப் பொருள்கள் பறிமுதல் செய்யப்பட்டுள்ளன.

பழைய குற்றவாளிகள் இளைஞா்களையும், சிறாா்களையும் குற்றச் செயல்களுக்கு பயன்படுத்துகின்றனா். சிறுவா்கள் இதுபோல குற்றங்களில் ஈடுபடாமலிருக்க கிராமம்தோறும் சிறாா் மன்றங்களை ஏற்படுத்தும் பணிகள் நடைபெறுகின்றன.

இரவு நேர ரோந்தின்போது பிரச்னைக்குரிய இடங்களை அறிந்து போலீஸாருக்கு ஆயுதங்களை வழங்க ஏற்பாடு செய்துள்ளோம் என்றாா் அவா்.

தொடா்ந்து மூன்று நாள்கள் நடைபெறும் கைப்பந்து, கூடைப்பந்து, கோகோ, ஹாக்கி, யோகா, கால்பந்து டேபிள் டென்னிஸ், கபடி போட்டிகளில் காவல் துறையின் 7 மண்டலங்களுக்குட்பட்ட வீரா்-வீராங்கனைகள் பங்கேற்கின்றனா்.