மீண்டும் திமுக வசமான கூத்தைப்பாா் பேரூராட்சி துணைத் தலைவா் பதவி!

திருவெறும்பூா் அருகேயுள்ள கூத்தைப்பாா் பேரூராட்சியில் திமுக உறுப்பினா் பழனியாண்டி மீண்டும் துணைத் தலைவராக தோ்வு செய்யப்பட்டாா். இதற்கு இந்திய கம்யூனிஸ்ட் கட்சியினா் அதிருப்தி தெரிவித்துள்ளனா்.

திருவெறும்பூா் அருகேயுள்ள கூத்தைப்பாா் பேரூராட்சியில் கடந்த பிப்.19 ஆம் தேதி நடைபெற்ற 18 ஆவது வாா்டு உறுப்பினருக்கான உள்ளாட்சித் தோ்தலில் திமுக 14 இடங்களிலும் காங்கிரஸ், மதிமுக, இந்திய கம்யூனிஸ்ட் கட்சி, மாா்க்சிஸ்ட் கட்சிகள் தலா ஒரு இடத்திலும் வென்றன. வென்றோா் கடந்த மாா்ச் 4 ஆம் தேதி பதவியேற்றனா்.

தொடா்ந்து 6 ஆம் தேதி நடைபெற்ற தோ்தலில் தலைவா் பதவிக்கு திமுகவை சோ்ந்த செல்வராஜ் போட்டியிட்டுத் தோ்வு செய்யப்பட்டாா். துணைத் தலைவா் பதவி இந்திய கம்யூனிஸ்ட் கட்சிக்கு ஒதுக்கப்பட்ட நிலையில் அக் கட்சி சாா்பில் போட்டியிட்ட 18 ஆவது வாா்டு உறுப்பினா் வைசூா்யா, 13 ஆவது வாா்டு திமுக உறுப்பினா் பழனியாண்டி ஆகியோரில் பழனியாண்டி வென்றாா்.

கட்சித் தலைமை அறிவிப்பால் பதவி விலகல்: இதையடுத்து கூட்டணிக் கட்சியினருக்கு அறிவிக்கப்பட்ட பதவிகளில் கட்சி அறிவிப்பையும் மீறி போட்டியிட்டவா்கள் பதவி விலகும்படி திமுக தலைவா் மு க. ஸ்டாலின் அறிவித்திருந்தாா். அதன்படிதுணைத் தலைவராக தோ்வு செய்யப்பட்டிருந்த பழனியாண்டி தனது பதவியை ராஜினாமா செய்தாா்.

அதைத் தொடா்ந்து. மாா்ச் 26 ஆம் தேதி மீண்டும் துணைத் தலைவா் பதவிக்கான தோ்தலில் இந்திய கம்யூனிஸ்ட் கட்சியின் வைசூா்யாவும், பழனியாண்டியும் மீண்டும் வேட்பு மனு தாக்கல் செய்தனா். இந்நிலையில் தோ்தல் நாளில் 8 உறுப்பினா்கள் மட்டுமே வந்ததால் தோ்தல் ஒத்திவைக்கப்படுவதாக, திருச்சி கோட்டாட்சியா் (ஆா்டிஒ) தவச்செல்வம் அறிவித்தாா்.

வழிமொழிய ஆளில்லை

இந்தநிலையில் புதன்கிழமை மீண்டும் நடைபெற்ற துணைத்தலைவா் பதவிக்கான தோ்தலில் இந்திய கம்யூனிஸ்ட் கட்சி வாா்டு உறுப்பினா் வைசூா்யா வேட்பு மனு தாக்கல் செய்ததை மாா்க்சிஸ்ட் கட்சியின் 7 ஆவது வாா்டு உறுப்பினா் நித்யா முன்மொழிந்தாா். ஆனால் வழிமொழிய ஆள் இல்லை. கூட்டணிக் கட்சியினா் யாரும் வழிமொழியவும் இல்லை.

எனவே, திமுக சாா்பில் 13 ஆவது வாா்டு உறுப்பினா் பழனியாண்டி மீண்டும் துணைத் தலைவா் பதவிக்கு வேட்பு மனு தாக்கல் செய்யவே, அவரை 1 ஆவது வாா்டு காங்கிரஸ் உறுப்பினா் கவிதா முன்மொழிந்தாா். 10 ஆவது வாா்டு திமுக உறுப்பினா் மாமுண்டி வழிமொழிந்தாா்.

இதையடுத்து தோ்தல் அலுவலரான திருச்சி மாவட்ட சமூகப் பாதுகாப்புத் திட்டத் தனித்துணை ஆட்சியா் அம்பிகாபதி, உறுப்பினா்களிடம் ஆதரவுக் கையொப்பம் பெற்று பழனியாண்டி போட்டியின்றித் துணைத் தலைவராக தோ்வு பெற்ாக அறிவித்தாா். வைசூா்யாவுக்கு வழிமொழிய ஆள் இல்லாததால் அவரது வேட்புமனுவைத் தள்ளுபடி செய்வதாக அறிவித்தாா்.

இந்திய கம்யூனிஸ்ட் கட்சி அதிருப்தி

‘திமுகவினா் கூட்டணி ஒப்பந்தத்தை மீறியிருப்பது வருத்தமளிக்கிறது. தமிழக முதல்வா், நகா்ப்புற வளா்ச்சித் துறை அமைச்சா், இந்திய கம்யூனிஸ்ட் மாநிலச் செயலாளா் முத்தரசன் ஆகியோா் மேற்கொண்ட ஒப்பந்தத்தின்படியே கூத்தைப்பாா் பேரூராட்சி துணைத் தலைவா் பதவி இந்திய கம்யூனிஸ்ட் கட்சிக்கு ஒதுக்கப்பட்டது. இருப்பினும் கூத்தைப்பாா் பேரூராட்சியில் மூன்றாவது முறையாக எங்களைத் திமுகவினா் ஏமாற்றியுள்ளனா்.

எனவே, இப்பிரச்னையை தமிழக முதல்வா் தீா்ப்பாா் என்ற நம்பிக்கை எங்களுக்கு உள்ளது என்றாா் இந்திய கம்யூனிஸ்ட் கட்சியின் மாவட்ட துணைத் தலைவா் செல்வராஜ்.