காவிரி ஆற்றில் தண்ணீா் அதிகம் செல்வதால் ஆடிப்பெருக்கு (சனி) மற்றும் ஆடி அமாவாசையை (ஞாயிறு) பொதுமக்கள் பாதுகாப்பாக கொண்டாட வேண்டும் என திருச்சி மாவட்ட ஆட்சியா் தெரிவித்துள்ளாா்.

ஆடிப்பெருக்கையொட்டி திருச்சி மாவட்டம் முழுவதும் சனிக்கிழமை காவிரி ஆற்றின் கரைகளில் பொதுமக்கள் கூடி , நீராடி, புத்தாடைகள் அணிந்து, காவிரித்தாய்க்கு, காப்பரிசி, காதோலை, கருகமணி உள்ளிட்ட மங்கலப்பொருள்கள் வைத்து படையலிட்டு, வழிபடுவது வழக்கம். இதேபோல புதுமண தம்பதியினா் காவிரி ஆற்றுக்கு வந்து காவிரி தாயை வணங்கி புது மஞ்சள் கயிற்றை கழுத்தில் கட்டிக் கொள்வாா்கள்.

இதேபோல ஞாயிற்றுக்கிழமை ஆடி அமாவாசை என்பதால் காவிரி கரையோரத்தில் முன்னோா்களுக்கு தா்பணம் கொடுப்பதற்காக ஏராளமானோா் திரண்டு வருவாா்கள்.

இந்நிலையில், தற்போது காவிரி ஆற்றில் வெள்ளிக்கிழமை மாலை நிலவரப்படி சுமாா் 43 ஆயிரம் கன அடி தண்ணீா் செல்கிறது. இது சனிக்கிழமை மேலும் அதிகரிக்கவும் வாய்ப்புள்ளது.

இதனால் ஆடிப்பெருக்கை கொண்டாடும் முக்கிய பகுதிகளான அம்மா மண்டபம், சிந்தாமணி, அய்யாளம்மன் படித்துறைகள் உள்ளிட்ட 50க்கும் மேற்பட்ட இடங்களில் பொதுமக்கள் யாரும் ஆற்றுக்குள் இறங்காதவாறு பாதுகாப்பு ஏற்பாடுகள் செய்யப்பட்டுள்ளன.

இந்நிலையில், காவிரி மற்றும் கொள்ளிடம் ஆற்றுக் கரைகளில் மேற்கொள்ளப்பட்டுள்ள பாதுகாப்பு ஏற்பாடுகளை மாவட்ட ஆட்சியா் மா. பிரதீப்குமாா் வெள்ளிக்கிழமை நேரில் ஆய்வு மேற்கொண்டாா்.

பின்னா் அவா் செய்தியாளா்களிடம் கூறியது: கொள்ளிடம் ஆற்றில் அடித்துச் செல்லப்பட்ட தடுப்புச் சுவா் குறித்து தண்ணீா் குறைந்த பிறகு ஆய்வு செய்யப்படும்.

மேலும், ஆற்றுக்குள் சாய்ந்து விழுந்த மின் கோபுரங்களுக்கு பதிலாக புதிய கோபுரங்கள் அமைக்க நடவடிக்கை எடுக்கப்படும். தற்போது, அப்பகுதியில் தடையின்றி மின்விநியோகம் செய்யப்படுகிறது.

காவிரி மற்றும் கொள்ளிடம் ஆற்றில் அதிகளவில் தண்ணீா் செல்வதால் ஆடிபெருக்கு, ஆடி அமாவாசையையொட்டி சனி மற்றும் ஞாயிற்றுக்கிழமைகளில் படித்துறை இல்லாத பகுதிகளில் மக்கள் இறங்குவதற்கும், நீராடுவதற்கும் தடை விதிக்கப்பட்டுள்ளது. எனவே, பொதுமக்கள், மாவட்ட நிா்வாகத்துக்கு உரிய ஒத்துழைப்பு வழங்கி, ஆடிப்பெருக்கு மற்றும் ஆடி அமாவாசையை பாதுகாப்பாக கொண்டாட வேண்டும் என்றாா் அவா்.

52 இடங்கள் அபாயகரமானவை

திருச்சி மாவட்டத்தில் காவிரி, கொள்ளிடக் கரைகளில் 52 இடங்கள் அபாயகரமானவை என கண்டறியப்பட்டு அங்கு கண்காணிப்பு பணிகள் தீவிரப்படுத்தப்பட்டுள்ளன.

தொட்டியம் வட்டம்: உன்னியூா், பெரியபள்ளிபாளையம், சின்னப்பள்ளி பாளையம்,. ஸ்ரீராமசமுத்திரம், சீலைப்பிள்ளையாா்புத்தூா் காடுவெட்டி, நத்தம், எம்.புத்தூா் (மேலக்காரைக்காடு, கீழகாரைக்காடு), அரசலூா் (திருநாராயணபுரம், வரதராஜபுரம்), சீனிவாசநல்லூா் (மகேந்திர மங்கலம், கீழசீனிவாசநல்லூா், சத்திரம், மணமேடு, முள்ளிப்பாடி (திருஈங்கோய்மலை)

முசிறி வட்டம்: முசிறி மேற்கு காவிரி பாலம், சந்தபாளையம், பரிசல் துறை (அழகு நாச்சியம்மன் கோயில்), அக்ரஹாரம், அய்யம்பாளையம், ஆமூா், குணசீலம்.

ஸ்ரீரங்கம் வட்டம்: பேட்டவாய்த்தலை (பழங்காவிரி படித்துறை) முக்கொம்பு, கம்பரசம்பேட்டை (தடுப்பணை), முருங்கப்பேட்டை, முத்தரசநல்லூா் அக்ரஹார படித்துறை, பளுா் படித்துறை, அல்லூா் மேலத்தெரு படித்துறை, திருச்செந்துறை வெள்ளாளா் தெரு படித்துறை, அந்தநல்லூா் படித்துறை, திருப்பராய்துறை - துலாஸ்தானம், மேலூா் அய்யனாா் படித்துறை, கீதாபுரம் படித்துறை, கருடமண்டபம் படித்துறை, பஞ்சக்கரை படித்துறை, பனையபுரம் படித்துறை, உத்தமா்சீலி நடுவெட்டி படித்துறை, கிளிக்கூடு படித்துறை.

மண்ணச்சநல்லூா் வட்டம்: கரியமாணிக்கம் மேற்கு கிராமம் - வாத்தலை, கிழக்கு கிராமம் - சிறுகாம்பூா், திருவாசி கிராமம் - துடையூா் களிங்காயிகோவில், மாதவ பெருமாள் கோவில் கிராமம் - நொச்சியம் மான்பிடி மங்கலம், பிச்சாண்டாா் கோவில் கிராமம் - அய்யன்வாய்க்கால்.

திருவெறும்பூா் வட்டம்: வேங்கூா் பூச படித்துறை, பனையக்குறிச்சி படித்துறை, கீழ முல்லக்குடி படித்துறை, ஒட்டக்குடி படித்துறை.

லால்குடி வட்டம்: கொள்ளிடம் ஆறு மற்றும் பங்குனி வாய்க்கால்- அப்பாத்துரை கிராமம், கூகூா், அரியூா் (செங்கரையூா் மற்றும் பூண்டி பாலம்) விரகாலூா் மற்றும் தின்னக்குளம், நத்தமாங்குடி.

திருச்சி மாநகரப்பகுதி: சுப்பிரமணிய சுவாமி கோயில் படித்துறை, காந்தி படித்துறை, ஓடத்துறை, அய்யாளம்மன் படித்துறை தில்லைநாயகம் படித்துறை ஆகிய இடங்களில் கண்காணிப்பு பலப்படுத்தப்பட்டுள்ளது.

இதில், படித்துறை உள்ள பகுதிகளில் மட்டும் கட்டுப்பாடுகளுடன் ஆடிப்பெருக்கு, ஆடி அமாவாசைக்கு பொதுமக்கள் அனுமதிக்கப்படுவா். இதர 52 இடங்கள் அபாயகரமானவை என்பதால் தடை விதிக்கப்படுகிறது. அப்பகுதியில் தீயணைப்புத்துறை, காவல்துறை, வருவாய்த்துறையினா் 24 மணி நேரமும் சுழற்சி அடிப்படையில் கண்காணிப்பில் ஈடுபட்டு வருகின்றனா்.