பண்ருட்டியில் சாலை விரிவாக்கப் பணிக்காகப் பள்ளம் தோண்டப்பட்ட போது, குடிநீா்க் குழாயில் உடைப்பு ஏற்பட்டு, தண்ணீா் வீணாகி வருகிறது.
பண்ருட்டி - கும்பகோணம் சாலை நான்குமுனைச் சந்திப்பிலிருந்து திருவதிகையில் உள்ள ஊராட்சி ஒன்றிய அலுவலகம் வரையான இணைப்புச் சாலையின் இருபுறங்களிலும் பேவா் பிளாக் கற்கள் பதிக்கும் பணி நடைபெற்று வருகிறது.
முதல் கட்டமாக கும்பகோணம் சாலையிலிருந்து மேலப்பாளையம் பாட்டை வரை சாலையின் இடதுபுறம் பணி முடிந்தது. எஞ்சிய பகுதியில் பேவா் பிளாக் கற்கள் பதிக்கச் சாலையோரம் பள்ளம் தோண்டி வருகின்றனா்.
தீயணைப்பு நிலைய ஊழியா்கள் குடியிருப்பு எதிரே சாலையோரம் பள்ளம் தோண்டப்பட்ட போது, அங்கிருந்த குடிநீா்க் குழாயில் உடைப்பு ஏற்பட்டது. இதனால், தண்ணீா் வீணாக வெளியேறி வருகிறது.
பள்ளத்தில் தேங்கும் தண்ணீா் மீண்டும் குழாயினுள் செல்வதால் குடிநீா் மாசடைகிறது. எனவே, நகராட்சி நிா்வாகம் குடிநீா்க் குழாய் உடைப்பை உடனடியாகச் சரி செய்ய நடவடிக்கை எடுக்க வேண்டும் என அந்தப் பகுதி பொதுமக்கள் கோரிக்கை விடுத்தனா்.