புதுச்சேரி அமலோற்பவம் பள்ளியின் லூா்து அகாதெமி சாா்பில், இலவச மருத்துவ முகாம், மரக்கன்றுகள் நடும் நிகழ்ச்சி ஆகியவை அண்மையில் நடைபெற்றன.

விழாவில் சிறப்பு விருந்தினராகப் பங்கேற்ற பொதுப் பணித் துறை அமைச்சா் ஆ.நமச்சிவாயம் முகாமைத் தொடக்கிவைத்தாா். பள்ளிக் கல்வித் துறைக் கூடுதல் ஆய்வாளா் குமாா், நாட்டு நலப்பணித் திட்ட இணை ஒருங்கிணைப்பாளா் சௌந்தரராஜன், முன்னாள் எம்எல்ஏ ஆனந்த், புனித சவேரியாா் ஆலய அருள்தந்தை லாரன்ஸ் ஆகியோா் வாழ்த்திப் பேசினா்.

கொம்பாக்கம் பிரதான சாலையான முருகப்பாக்கம் - வில்லியனூா் சாலையோரங்களில் பள்ளி சாா்பில் மரக்கன்றுகள் நடப்பட்டன. மேலும், புனித சவேரியாா் ஆலய வளாகத்தில் நடைபெற்ற இலவச மருத்துவ முகாமில் பொது மருத்துவா் சுப்பையா, புனித மேரி கண் மருத்துவமனை மருத்துவா் அமலராஜ், நுரையீரல் மருத்துவா் ஆண்டோனியஸ், ஸ்மைல் கோ் பல் மருத்துவா் தன்ராஜ் ஆகியோா் மருத்துவ முகாமில் நோயாளிகளைப் பரிசோதித்து, மருத்துவ ஆலோசனைகளை வழங்கினா்.

செவ்வந்தி பாா்மஸி சாா்பில், இலவச சா்க்கரை பரிசோதனை, ரத்த அழுத்தம் தொடா்பான ஆலோசனைகள் வழங்கப்பட்டன.

இலவச மருத்துவ முகாமில் சுமாா் 100-க்கும் மேற்பட்ட பொதுமக்கள் பங்கேற்றுப் பயனடைந்தனா். முன்னதாக, விழாவில் பள்ளியின் நிறுவனரும் தாளாளருமான லூா்துசாமி வரவேற்றாா்.