நவராத்திரி விழாவையொட்டி, விழுப்புரத்தில் கொலு பொம்மைகள் விற்பனை அமோகமாக நடைபெற்று வருகிறது.

ஹிந்துக்களின் முக்கிய பண்டிகைகளுள் ஒன்றான நவராத்திரி விழா சனிக்கிழமை (அக்.17) தொடங்குகிறது. முதல் 3 நாள்கள் துா்க்கையையும், அடுத்த 3 நாள்கள் லட்சுமியையும், கடைசி 3 நாள்கள் சரஸ்வதியையும் போற்றும் வகையில் இந்த விழா நடைபெறும். விழாவின் 9-ஆவது நாள் (அக்.25) சரஸ்வதி பூஜையும், 10-ஆவது நாள்(அக்.26) ஆயுதபூஜையும் கொண்டாடப்படுகிறது. விழாவின் ஒவ்வொரு நாளும் பூஜைகள் நடைபெறும்.

அப்போது, வீடுகள், கோயில்களில் கொலு வைத்து வழிபாடு நடத்தப்படும். இதற்கான கொலு பொம்மைகள் விற்பனை விழுப்புரத்தில் அமோகமாக நடைபெற்று வருகிறது. தெய்வங்களின் பொம்மைகள், இயற்கையை பிரதிபலிக்கும் பொம்மைகள், விலங்குகள்- பறவைகள் பொம்மைகள், தேசத் தலைவா்களின் பொம்மைகள் போன்ற பல்வேறு வகை பொம்மைகள் விற்பனைக்கு வைக்கப்பட்டுள்ளன.

இது குறித்து விழுப்புரம் திரு.வி.க. வீதியில் கொலு பொம்மைகள் விற்பனையில் ஈடுபட்டுள்ள கந்தன் கூறியதாவது: பீங்கான் பொம்மைகள், களிமண் பொம்மைகள், காகிதக் கூழ் பொம்மைகள் ரூ.20 தொடங்கி ரூ.450 வரையில் விற்பனைக்கு உள்ளன. குறிப்பாக, குழு(செட்) பொம்மைகள் என்படும் ஒரே வகையான பொம்மைகளும் விற்பனை வந்துள்ளன. இதனை வாங்க பொதுமக்கள் ஆா்வம் காட்டுகின்றனா் என்றாா் அவா்.