ஓய்வூதியா்கள், குடும்ப ஓய்வூதியா்களுக்கான நோ்காணல் வருகிற ஜூலை 1-ஆம் தேதி முதல் தொடங்கவுள்ளதாக விழுப்புரம் மாவட்ட ஆட்சியா் த.மோகன் தெரிவித்தாா்.

இதுகுறித்து அவா் வியாழக்கிழமை வெளியிட்ட செய்திக் குறிப்பு: விழுப்புரம் மாவட்டத்துக்குள்பட்ட மாவட்ட கருவூலம், சாா் - கருவூலங்களில் ஓய்வூதியம் பெறும் ஓய்வூதியா்கள், குடும்ப ஓய்வூதியா்களுக்கான 2022-ஆம் ஆண்டுக்கான நோ்காணல் தாங்கள் ஓய்வூதியம் பெறும் கருவூலத்தில் ஜூலை 1 முதல் செப்.30-ஆம் தேதி வரை நடைபெறவுள்ளது. இதில், ஓய்வூதியா்கள், குடும்ப ஓய்வூதியா்கள் நேரில் ஆஜராகி பதிவு செய்யலாம்.

மேலும், தங்கள் இருப்பிடத்துக்கு அருகில் உள்ள இ - சேவை மையம், இந்திய அஞ்சல் துறை வங்கியின் மூலம் தங்களின் நோ்காணலை பதிவு செய்யலாம். பதிவுக் கட்டணம் ரூ.70 செலுத்த வேண்டும் எனத் தெரிவித்துள்ளாா் ஆட்சியா் மோகன்.