ஆட்டோ மொபைல் உதிரி பாகங்கள் தயாரிப்பில் ஈடுபட்டு வரும் ரானே மெட்ராஸ் நிறுவனத்தின் மூன்றாம் காலாண்டு வருவாய் 20 சதவீதம் அதிகரித்து ரூ. 204.52 கோடி பெற்றதாகத் தெரிவித்தது.
அந்நிறுவனம் வெளியிட்டிருக்கும் செய்திக்குறிப்பில் தெரிவித்திருப்பதாவது:
மூன்றாம் காலாண்டில் கார் மற்றும் வர்த்தக வாகனங்களின் உதிரி பாகங்களுக்குத் தேவை அதிகரித்தது. எனினும் வேளாண் வாகனங்களின் உதிரி பாகங்களுக்கான தேவை சற்று குறைந்தது. சில்லறை விற்பனையும் சரிவை சந்தித்தது. இந்த நிலையிலும் நிறுவனத்தின் வருவாய் 20 சதவீதம் அதிகரித்து ரூ. 204.52 கோடியை நிறுவனம் பெற்றது. வட்டி, வரிக்கு முந்தைய மொத்த லாபம் முந்தைய ஆண்டின் இதே கால அளவில் பெற்றதைவிட 13 சதவீதம் அதிகரித்து ரூ. 20.17 கோடியாக இருந்தது. வரிக்குப் பிந்தைய நிகர லாபம் ரூ. 2.72 கோடியாகும்.
ஏப்ரல் முதல் டிசம்பர் வரையிலான 9 மாத கால அளவில் மொத்த வருவாய் 17 சதவீதம் அதிகரித்து ரூ. 729.74 கோடியாக இருந்தது. நிகர லாபம் 20 சதவீதம் அதிகரித்து ரூ. 12 கோடியாக இருந்தது. இடைக்கால ஈவுத்தொகையாக பங்கு ஒன்றுக்கு ரூ. 2 வழங்க நிர்வாக குழு ஒப்புதல் வழங்கியுள்ளது என்று அந்த நிறுவனம் தெரிவித்துள்ளது.