ஹெச்டிஎஃப்சி நிறுவனம் நான்காம் காலாண்டில் ரூ.2,862 கோடி நிகர லாபம் ஈட்டியுள்ளது.
இதுகுறித்து அந்த நிறுவனம் திங்கள்கிழமை வெளியிட்ட அறிக்கையில் தெரிவித்துள்ளதாவது:
நடப்பாண்டு மார்ச் மாதத்துடன் முடிவடைந்த நான்காவது காலாண்டில் ஹெச்டிஎஃப்சி நிறுவனம் ரூ.11,586.58 கோடி மொத்த வருவாய் ஈட்டியுள்ளது. இது, கடந்த 2017-18  நிதியாண்டின் நான்காம் காலாண்டில் ஈட்டிய வருவாய் ரூ.9,322.36 கோடியுடன் ஒப்பிடுகையில் மிகவும் அதிகம்.
குறிப்பாக, நிறுவனத்தின் நிகர வட்டி  வருமானம் ரூ.2,650 கோடியிலிருந்து 19 சதவீதம் வளர்ச்சி கண்டு ரூ.3,161 கோடியை எட்டியுள்ளது.
வருவாய் சிறப்பான அளவில் அதிகரித்ததையடுத்து ஜனவரி-மார்ச் வரையிலான நான்காவது காலாண்டில் நிறுவனத்தின் நிகர லாபம் ரூ.2,257 கோடியிலிருந்து 26.8 சதவீதம் அதிகரித்து ரூ.2,862 கோடியானது.
கடந்த 2018-19 நிதியாண்டுக்கு இறுதி ஈவுத்தொகையாக பங்கு ஒன்றுக்கு ரூ.17.50 வழங்க நிறுவனத்தின் இயக்குநர்கள் குழு பரிந்துரைத்துள்ளது. ஏற்கெனவே இடைக்கால ஈவுத்தொகையாக பங்கு ஒன்றுக்கு ரூ.3.50 வழங்கப்பட்ட நிலையில் கடந்த நிதியாண்டுக்கு பங்கு ஒன்றுக்கு மொத்தம் ரூ.21 ஈவுத்தொகையாக அறிவிக்கப்பட்டுள்ளது. 
2017-18 நிதியாண்டில் பங்கு ஒன்றுக்கு ரூ.20 ஈவுத்தொகை வழங்கப்பட்டது என அந்த அறிக்கையில் ஹெச்டிஎஃப்சி தெரிவித்துள்ளது.