பாகுபலி படத்தின் மூலம் ஒட்டுமொத்த இந்திய திரையுலகின் கவனத்தையும் தன் பக்கம் ஈர்த்த பிரபாஸ் நடிப்பில் உருவாகியுள்ள 'கல்கி 2898ஏடி' திரப்படத்தின் டிரைலர் இன்று(ஜூன் 10) மாலை 7.15 மணிக்கு வெளியிடப்பட்டுள்ளது.

பிரபாஸுடன் கமல்ஹாசனும் அமிதாப் பச்சனும் இணைந்து இப்படத்தில் நடித்துள்ளதால், ரசிகர்கள் மத்தியில் இப்படத்தின் மீது மிகுந்த எதிர்பார்ப்பு எழுந்துள்ளது. நாக் அஸ்வின் இயக்கியுள்ள இப்படத்திற்கு சந்தோஷ் நாராயணன் இசையமைத்துள்ளார்.

'கல்கி 2898ஏடி' படத்தில் இதுவரை பார்த்திடாத வகையில் அமிதாப் பச்சன், தீபிகா படுகோன் உள்ளிட்ட நடிகர்களின் தோற்றம் அமைந்துள்ளது, ரசிகர்களிடம் வரவேற்பையும் பெற்றுள்ளது.இந்த நிலையில், 2.20 நிமிட விடியோவாக 'கல்கி 2898' டிரைலரை படக்குழு உருவாக்கியுள்ளது.

ரசிகர்களின் எதிர்பார்ப்பை பூர்த்தி செய்யும் விதத்தில் டிரைலர் அமைந்துள்ளதால் இப்படத்தின் மீதான எதிர்பார்ப்பு மேலும் அதிகரித்துள்ளது. ஜூன் 27-ஆம் தேதி 'கல்கி 2898ஏடி' திரைக்கு வரவிருக்கிறது.