விஜய் டிவி புகழ் ஓராண்டுக்கு முன்பாகவே சுயமரியாதை திருமணம் செய்துகொண்ட புகைப்படங்கள் சமூக வலைதளங்களில் வைரலாகி வருகிறது. 

விஜய் டிவி புகழுக்கும் கோவையைச் சேர்ந்த பென்ஸியா என்பவருக்கும் சமீபத்தில் இந்து முறைப்படி திருமணம் நடைபெற்றது. இருவரும் வெவ்வேறு மதத்தை சார்ந்தவர்கள் என்பது குறிப்பிடத்தக்கது. 

திருமண புகைப்படங்களை புகழ் தனது சமூக வலைதள பக்கங்களில் பகிர அவருக்கு வாழ்த்துகள் குவிந்த வண்ணம் இருக்கின்றன. இயக்குநரும் நடிகருமான சசிகுமார் நேரில் சென்று மணமக்களை வாழ்த்தினார்.

இதையும் படிக்க | ''தொடர்ந்து இந்துக்களுக்காக போராடுவேன்'' - கனல் கண்ணன் அதிரடி​

இந்த நிலையில் கடந்த ஓராண்டுக்கு முன்பாகவே புகழ், பென்ஸியாவை கோவை பெரியார் படிப்பகத்தில் பதிவு திருமணம் செய்துகொண்டிருக்கிறார். தந்தை பெரியார் திராவிடர் கழக பொதுச்செயலாளர் கு.ராமகிருஷ்ணன் இவர்களுக்கு திருமணத்தை நடத்திவைத்துள்ளார். அப்போது எடுக்கப்பட்ட புகைப்படங்கள் சமூக வலைதளங்களில் வைரலாகி வருகிறது. 

விஜய் டிவியின் குக் வித் கோமாளி நிகழ்ச்சியின் மூலம் பிரபலமானவர் புகழ். இவருக்காகவே அந்த நிகழ்ச்சியைப் பார்ப்பவர்கள் ஏராளம். தற்போது தமிழ் சினிமாவில் நகைச்சுவை நடிகராக சில படங்களில் நடிக்கத் துவங்கியிருக்கிறார். 

மேலும் ஜூ கீப்பர் என்ற படத்தில் தற்போது ஹீரோவாகவும் நடித்துவருகிறார்.