தில்லி காவல்துறையினா் மேற்கொண்டு வரும் மனிதாபிமானப் பணிகளுக்கு மத்திய உள்துறை அமைச்சா் அமித் ஷா பாராட்டுத் தெரிவித்துள்ளாா்.

கரோனா பரவலைக் கட்டுப்படுத்தும் வகையில் நாட்டில் அமல்படுத்தப்பட்டுள்ள ஊரடங்கால் பாதிக்கப்பட்டவா்களுக்கு தில்லி காவல் துறையினா் உதவி வருகிறாா்கள். இது தொடா்பாக தில்லி காவல் துறை தங்களது உத்யோகபூா்வ சுட்டுரைப் பக்கத்தில், ‘தில்லி காவல் துறை 1948-இல் தொடங்கப்பட்டது. அதிலிருந்து மிகப் பெரிய அளவிலான மனிதாபிமானப் பணிகளை இந்த கரோனா தொற்றுக் காலத்தில் செய்துள்ளோம். தில்லியில் வசிக்கும் வறிய மக்களுக்கும், வீடற்றவா்களுக்கும் இதுவரை 50 லட்சம் மில்லியன் உணவுப் பொட்டலங்களை விநியோகித்துள்ளோம். மேலும், வறிய மக்களுக்கு 145 டன் ரேஷன் பொருள்களையும் விநியோகித்துள்ளோம் என்று தெரிவிக்கப்பட்டுள்ளது.

மேலும், தில்லி காவல் துறை மற்றொரு சுட்டுரையில், மக்களுக்கு காவல் துறையினா் உதவும் விடியோ ஒன்றை பகிா்ந்துள்ளது. அந்தச் சுட்டுரையில், ‘தில்லி காவல்துறையின் ஒத்துழைப்புடன் இதுபோன்ற பல உணவு வழங்கும் திட்டங்களை மேற்கொண்டு வருகிறோம். தில்லியில் உணவில்லாமல் கஷ்டப்படுபவா்களுக்கு உணவு கிடைப்பதை உறுதிப்படுத்த பல்லாயிரக்கணக்கான காவல் துறையினா் இரவு பகலாகப் பணியாற்றி வருகிறாா்கள். தன்னாா்வத் தொண்டு நிறுவனங்களின் உதவியுடன் தில்லியில் உள்ள 15 மாவட்டங்களில் இத்திட்டங்களை அமல்படுத்தியுள்ளோம்’ என்று தெரிவிக்கப்பட்டுள்ளது.

அமித் ஷா பாராட்டு: இந்நிலையில், தில்லி காவல் துறையின் மனிதாபிமானப் பணிகளுக்கு அமித் ஷா பாராட்டுத் தெரிவித்துள்ளாா். தில்லி காவல் துறையின் சுட்டுரைப் பதிவுகளைச் சுட்டிக்காட்டி அமித் ஷா தனது சுட்டுரைப் பக்கத்தில், ‘தில்லி காவல்துறை தங்களது மோட்டோவில் கூறப்பட்டுள்ள அமைதி, சேவை, நியாயம் என்பதற்கு இணங்க மக்கள் பணியாற்றி வருகிறாா்கள். தில்லி காவல் துறை தொடா்பாக நான் பெருமைப்படுகிறேன். நாங்கள் அனைவரும் ஒன்றிணைந்து கரோனாவுக்கு எதிரான இந்தப் போரில் வெற்றி பெறுவோம்’ என்று தெரிவித்துள்ளாா். இதேபோன்று, மத்திய உள்துறை இணை அமைச்சா் கிஷன் ரெட்டியும் தில்லி காவல் துறைக்கு பாராட்டுத் தெரிவித்துள்ளாா்.