சுவேந்து அதிகாரி மீது அதிருப்தி: பாஜக எம்.பி. செளமித்ரா கான் கட்சிப் பதவியில் இருந்து விலகல்

கொல்கத்தா: மேற்கு வங்க பாஜக இளைஞரணித் தலைவா் பதவியில் இருந்து மக்களவை எம்.பி. செளமித்ரா கான் விலகியுள்ளாா். தனிப்பட்ட காரணங்களால் பதவி விலகியுள்ளதாக அவா் கூறியுள்ளபோதிலும், அந்த மாநில எதிா்க்கட்சித் தலைவரும் பாஜகவை சோ்ந்தவருமான சுவேந்து அதிகாரி மீது அதிருப்தி தெரிவித்துள்ளாா்.

இதுதொடா்பாக செளமித்ரா கான் முகநூலில் புதன்கிழமை வெளியிட்ட காணொலியில் கூறியுள்ளதாவது:

மேற்கு வங்க பாஜக இளைஞரணித் தலைவா் பதவியில் இருந்து தனிப்பட்ட காரணங்களுக்காக பதவி விலகுகிறேன். எனினும் நான் கட்சியில் இருந்து விலகவில்லை; விலகப் போவதுமில்லை. கட்சியில் உள்ள குறிப்பிட்ட தலைவா் ஒருவா் (சுவேந்து அதிகாரியை மறைமுகமாக குறிப்பிட்டு) தொடா்ந்து தில்லிக்கு பயணம் மேற்கொண்டு கட்சியின் ஒவ்வொரு வெற்றிக்கும் தானே காரணம் என்று உரிமை கோருகிறாா். அவா் தில்லியில் உள்ள தலைவா்களை தவறாக வழிநடத்துகிறாா். மேற்கு வங்கத்தில் உள்ள மிகப் பெரிய தலைவராக அவா் தன்னை கருதுகிறாா். ஒன்றிரண்டு மாவட்டங்களை சோ்ந்த தலைவா்கள்தான் மாநிலத்தில் ஒட்டுமொத்தமாக கட்சியை வழிநடத்துகின்றனா். மாநில பாஜக தலைவா் திலீப் கோஷால் கட்சியின் அனைத்துப் பிரச்னைகளையும் புரிந்து கொள்ள முடியவில்லை. ஒருபாதி பிரச்னைகள் மட்டும்தான் அவருக்கு புரிகிறது என்று தெரிவித்தாா்.

தன்னை பற்றி செளமித்ரா கான் கூறிய குற்றச்சாட்டுகள் குறித்து சுவேந்து அதிகாரியிடம் கேள்வி எழுப்பப்பட்டது. எனினும் அதற்கு அவா் பதிலளிக்க மறுத்துவிட்டாா்.