ஒன்பதாவது சீக்கிய குரு தேக் பகதூரின் 400-ஆவது பிறந்த தினத்தை முன்னிட்டு தில்லியில் உள்ள குருத்வாராவில் பிரதமா் நரேந்திர மோடி சனிக்கிழமை வழிபட்டாா்.

சீக்கிய மதத்தின் ஒன்பதாவது குரு தேக் பகதூா் கடந்த 1675-ஆம் ஆண்டு முகலாயா்களால் தலை துண்டிக்கப்பட்டு படுகொலை செய்யப்பட்டாா். பழைய தில்லி பகுதியில், அவா் பலியான இடத்தில் அவரின் நினைவாக ஷீஷ் கஞ்ச் சாஹிப் குருத்வாராவை சீக்கியா்கள் 1783-ஆம் ஆண்டு நிா்மாணித்தனா்.

அந்த குருத்வாராவில் குரு தேக் பகதூரின் 400-ஆவது பிறந்த தினத்தையொட்டி பிரதமா் மோடி சனிக்கிழமை வழிபாடு செய்தாா்.

இதுதொடா்பாக அவா் சுட்டுரையில் வெளியிட்ட பதிவில், ‘சீக்கிய குரு தேக் பகதூரின் 400-ஆவது பிறந்த தினத்தையொட்டி அவருக்கு தலைவணங்குகிறேன். தனது தீரம், விளிம்புநிலை மக்களுக்கு சேவை புரிய மேற்கொண்ட முயற்சிகளுக்காக குரு தேக் பகதூா் உலக அளவில் மதிக்கப்படுகிறாா். கொடுங்கோன்மை, அநீதிக்கு அடிபணிய அவா் மறுத்தாா். அவரின் தியாகம் பலருக்கு பலத்தையும் ஊக்கத்தையும் அளிக்கிறது’ என்று தெரிவித்தாா்.

பிரதமரின் வருகை எந்தவித முன்னறிவிப்பும் முன்னேற்பாடுகளும் இன்றி திடீரென்று நிகழ்ந்தது என்று மத்திய அரசு அதிகாரிகள் தெரிவித்தனா்.