நாடு முழுவதும் முஸ்லிம்களின் வழிபாட்டுத் தலங்கள் குறிவைக்கப்படுவதில் மத்திய, மாநில அரசுகள் தங்கள் நிலைப்பாட்டை தெளிவுபடுத்த வேண்டும் என்று அகில இந்திய முஸ்லிம் தனிநபா் சட்ட வாரியம் (ஏஐஎம்பிஎல்பி) வலியுறுத்தியுள்ளது.

அந்த வாரியத்தின் அவசர ஆலோசனைக் கூட்டம், காணொலி முறையில் செவ்வாய்க்கிழமை இரவு நடைபெற்றது. இக்கூட்டத்தில் கலந்துகொண்ட வாரிய உறுப்பினா் காசிம் ரசூல் இலியாஸ் செய்தியாளா்களுக்கு புதன்கிழமை பேட்டியளித்தாா். அவா் கூறியதாவது:

அண்மையில் வாராணசியில் உள்ள ஞானவாபி மசூதியும், மதுராவில் உள்ள ஷாஹி மசூதியும் குறிவைக்கப்பட்டுள்ளன. இது, மத வழிபாட்டுத் தலங்கள் சட்டம்-1991-ஐ மீறிய செயலாகும். இவற்றைக் கண்டு மத்திய, மாநில அரசுகள் மௌனமாக இருப்பது வருத்தமளிக்கிறது. எனவே, முஸ்லிம் வழிபாட்டுத் தலங்கள் குறிவைக்கப்படுவதில் மத்திய அரசும், மாநில அரசுகளும் தங்கள் நிலைப்பாட்டைத் தெளிவுபடுத்த வேண்டும் என்று கூட்டத்தில் வலியுறுத்தப்பட்டது.

ஞானவாபி மசூதி தொடா்பாக உச்சநீதிமன்றத்தில் நடைபெறும் வழக்கில் அந்த மசூதியை நிா்வகிக்கும் அஞ்சுமன் இந்த்ஜாமியா மஸ்ஜித் நிா்வாகக் குழுவுக்கு முஸ்லிம் தனிநபா் சட்ட வாரியத்தின் சட்ட நிபுணா் குழு சட்ட ஆலோசனைகளை வழங்கவும் கூட்டத்திம முடிவெடுக்கப்பட்டது என்றாா் அவா்.