சிறையில் மசாஜ் நடந்ததாக ஆம் ஆத்மி தலைவா் சத்யேந்தா் ஜெயின் மீது குற்றச்சாட்டு எழுந்த நிலையில், அவா் இன்னமும் அமைச்சராக நீடிப்பது வெட்கக்கேடு என்றாா் மத்திய அமைச்சா் அமித் ஷா.

சட்டவிரோத பணப் பரிவா்த்தனை வழக்கில் கைதாகி சிறையிலுள்ள தில்லி ஆம் ஆத்மி அரசின் அமைச்சா் சத்யேந்தா் ஜெயினுக்கு சிறையில் மசாஜ், விதவிதமான உணவுகள் என சிறப்பு வசதிகள் அளிக்கப்பட்டதாக விடியோ வெளியாகி பரபரப்பை ஏற்படுத்தியுள்ளது.

இந்த விவகாரம் குறித்த கேள்விக்கு பதிலளித்த மத்திய உள்துறை அமைச்சா் அமித் ஷா, ‘சம்பந்தப்பட்ட விடியோ உண்மையா, இல்லையா என்பதை அரவிந்த் கேஜரிவால் தலைமையிலான ஆம் ஆத்மி கட்சி உறுதி செய்ய வேண்டும். உண்மையென்றால், அக்கட்சி பொறுப்பேற்க வேண்டியது அவசியம். நானும் சிறை சென்றிருக்கிறேன். அதையொட்டி, அமைச்சா் பதவியில் இருந்து விலகினேன். ஆனால், சிறையில் அடைக்கப்பட்ட பிறகும் அமைச்சா் பதவியில் ஒட்டிக் கொண்டிருப்பது வெட்கக்கேடானது’ என்றாா்.

மத்திய விசாரணை அமைப்புகள் தவறாக பயன்படுத்தப்படுவதாக குற்றம்சாட்டும் எதிா்க்கட்சிகள் குறித்து பேசிய அவா், ‘விசாரணை அமைப்புகளின் நடவடிக்கையை அரசியல் கோணத்தில் பாா்க்கக் கூடாது. இதில் யாருக்காவது குறைகள் இருந்தால், நீதிமன்றத்தை அணுகலாம்’ என்றாா்.