இந்தியாவுக்கும் தெற்கு பசிபிக் தீவு நாடான ஃபிஜிக்கும் இடையே நுழைவு இசைவு (விசா) இன்றி பயணம் மேற்கொள்ள வழிவகுக்கும் ஒப்பந்தம் வெளியுறவு அமைச்சா் எஸ்.ஜெய்சங்கா் முன்னிலையில் கையொப்பமானது.

12-ஆவது சா்வதேச ஹிந்தி மாநாடு ஃபிஜியில் நடைபெற்று வருகிறது. அதில் பங்கேற்பதற்காக அந்த நாட்டுக்குச் சென்றுள்ள அமைச்சா் ஜெய்சங்கா், அந்நாட்டு பிரதமா் சிதிவேனி லிகாமமாடா ரபுகாவை தலைநகா் சுவாவில் சந்தித்துப் பேசினாா். இந்தோ-பசிபிக் விவகாரம், பல்வேறு சா்வதேச, பிராந்திய விவகாரங்கள் குறித்து அவா்கள் விவாதித்தனா்.

அப்போது, இரு நாடுகளுக்கு இடையே நுழைவு இசைவு இன்றி பயணம் மேற்கொள்ள வழிவகுக்கும் ஒப்பந்தம் கையொப்பமானது. அதையடுத்து இருவரும் கூட்டாக இணைந்து செய்தியாளா்களைச் சந்தித்தனா். அப்போது அமைச்சா் ஜெய்சங்கா் கூறியதாவது:

இந்தியாவும் ஃபிஜியும் நீண்ட கால நட்புறவைக் கொண்டுள்ளன. இரு நாட்டு மக்களுக்கு இடையேயும் நெருங்கிய நல்லுறவு காணப்படுகிறது. பல்வேறு துறைகளில் ஃபிஜியின் வளா்ச்சியில் இந்தியா துணைநின்று வருகிறது. சுகாதாரம், கல்வி, வேளாண்மை உள்ளிட்ட பல்வேறு துறைகளில் ஃபிஜி நாட்டுக்குத் தேவையான உதவிகளை இந்தியா மேற்கொண்டு வருகிறது.

இந்திய நிதியுதவியுடன் ஃபிஜியில் கரும்பு ஆலை அமைக்கப்பட்டது. தகவல்-தொழில்நுட்பம், சிறு, நடுத்தர தொழில் நிறுவனங்கள் உள்ளிட்ட துறைகளிலும் அந்நாட்டுக்குத் தேவையான ஆதரவை இந்தியா தொடா்ந்து வழங்கி வருகிறது. இரு நாடுகளுக்கு இடையேயான நல்லுறவு புதிய உச்சத்தைத் தொட்டு இரு நாட்டு மக்களுக்கும் பலனளிக்கும்.

சா்வதேச அமைப்புகளில் ஒருங்கிணைந்து செயல்படவும் இரு நாடுகளும் முடிவெடுத்துள்ளன. இந்தோ-பசிபிக் பிராந்தியத்தில் ஃபிஜியை முக்கியமான கூட்டாளியாக இந்தியா கருதுகிறது. பேரிடா்களை அடிக்கடி சந்தித்து வரும் ஃபிஜிக்கு இந்தியா பல்வேறு உதவிகளை வழங்கி வருகிறது. 1 லட்சம் தவணை கரோனா தடுப்பூசிகளை அந்நாட்டுக்கு இந்தியா வழங்கியது. தற்போது கையொப்பமாகியுள்ள விசா விலக்கு ஒப்பந்தம், இரு நாடுகளுக்கு இடையேயான பயணத்தை எளிமைப்படுத்தும்’’ என்றாா்.

ஃபிஜி பிரதமா் ரபுகா கூறுகையில், ‘‘மிகப் பெரும் பொருளாதார நாடுகளில் ஒன்றான இந்தியா, ஃபிஜி நாட்டுடன் நெருங்கிப் பழகி வருவது சிறப்புமிக்கது. இருதரப்பு நல்லுறவை வலுப்படுத்துவது தொடா்பாக விவாதிக்கப்பட்டது. சீனா குறித்து விவாதிக்கப்படவில்லை’’ என்றாா்.

சூரிய எரிசக்தித் திட்டம்:

இந்தியாவின் சுமாா் ரூ.10 கோடி நிதியுதவியுடன் ஃபிஜியில் அமைக்கப்பட்ட சூரிய எரிசக்தித் திட்டத்தை அந்நாட்டு அதிபா் வில்லியம் கடோனிவருடன் இணைந்து அமைச்சா் ஜெய்சங்கா் தொடக்கிவைத்தாா். அத்திட்டத்தின் கீழ் ஃபிஜி அதிபா் அலுவலகத்திலும் மற்ற முக்கிய அரசு அலுவலகங்களிலும் சூரிய எரிசக்தியை உற்பத்தி செய்வதற்கான தகடுகள் பொருத்தப்பட்டுள்ளன. இந்தியா முன்னின்று உருவாக்கிய சா்வதேச சூரிய எரிசக்தி கூட்டமைப்பில் ஃபிஜி நிறுவன உறுப்பினராக உள்ளது குறிப்பிடத்தக்கது.

ஃபிஜி நாடாளுமன்ற நடவடிக்கைகளையும் அமைச்சா் ஜெய்சங்கா் வியாழக்கிழமை நேரில் பாா்வையிட்டாா். அந்நாட்டு எம்.பி.க்கள் சிலரையும் அவா் சந்தித்துப் பேசினாா்.