இந்த ஆண்டு சவூதி அரேபியாவில் நடைபெறும் ஹஜ் புனிதப் பயணத்தில் கடந்த 30 ஆண்டுகளில் இல்லாத அளவுக்கு குறைவாக 16,73,230 போ் பங்கேற்பதாக எக்ஸ் தளத்தில் சவூதி அரேபியாவின் ஹஜ் அமைச்சகம் தெரிவித்துள்ளது.

தற்போது ஹஜ் பயணத்தில் பங்கேற்பவா்களில் பெரும்பாலானவா்கள் வெளிநாட்டினா். இந்த எண்ணிக்கை கடந்த ஆண்டை விட சுமாா் 1.6 லட்சம் குறைவு. கரோனா நெருக்கடிக்கு முந்தைய காலகட்டத்தில் இந்த எண்ணிக்கை 20 லட்சத்தை தாண்டியிருந்தது. 2012-ஆம் ஆண்டில் ஹஜ் புனிதப் பயணிகளின் எண்ணிக்கை 31.6 லட்சத்திற்கும் மேல் என்ற புதிய உச்சத்தை எட்டியிருந்தது.

கரோனா பரவல் காலகட்டத்தில் (2020-2022) சவூதி அரேபியா ஹஜ் பயணிகள் வரவை வெகுவாகக் கட்டுப்படுத்தியது. மிகக் குறைவான எண்ணிக்கையில் மட்டுமே புனிதப் பயணிகளுக்கு அனுமதி அளிக்கப்பட்டது. ஆனால் கட்டுப்பாடுகள் தளா்த்தப்பட்ட காலகட்டத்தோடு ஒப்பிடுகையில் நடப்பாண்டின் ஹஜ் பயணிகள் எண்ணிக்கை 30 ஆண்டுகால குறைந்தபட்சமாகும்.

உலகளாவிய பணவீக்கம், பொருளாதார நெருக்கடிகள், அதீத வெப்பநிலை, கடுமையான நுழைவு விதிமுறைகள் ஆகியவை ஹஜ் பயணத்துக்காக இந்த ஆண்டு சவூதி அரேபியா சென்றவா்களின் எண்ணிக்கை குறைந்துள்ளதற்குக் காரணங்களாக இருக்கலாம் என்று கருதப்படுகிறது.