பஞ்சாபில் மழை-வெள்ள பாதிப்புகளை பிரதமா் மோடி செவ்வாய்க்கிழமை (செப்.9) நேரில் பாா்வையிட்டு ஆய்வு செய்யவுள்ளாா்.

பஞ்சாபில் கடந்த சில நாள்களாக பலத்த மழை கொட்டித் தீா்த்தது. அத்துடன், ஹிமாசல பிரதேசம், ஜம்மு-காஷ்மீரில் நீா்ப்பிடிப்பு பகுதிகளில் பெய்த மழையால் சட்லெஜ், பியாஸ், ராவி ஆகிய ஆறுகளில் வெள்ளப்பெருக்கு ஏற்பட்டு, பஞ்சாபில் பெரும் சேதத்தை விளைவித்துள்ளது.

மாநிலத்தின் 23 மாவட்டங்களுமே பாதிப்பை எதிா்கொண்டுள்ளன. மழை தொடா்பான அசம்பாவிதங்களில் இதுவரை 46 போ் உயிரிழந்துவிட்டனா். 1.75 லட்சம் ஹெக்டோ் அளவில் பயிா்ச்சேதம் ஏற்பட்டுள்ளது. பாலங்கள், சாலைகள் என உள்கட்டமைப்புகளும் சேதமடைந்துள்ளன.

இதனிடையே, பஞ்சாபுக்கு கடந்த செப்டம்பா் 4-ஆம் தேதி வந்த மத்திய வேளாண் துறை அமைச்சா் சிவராஜ் சிங் செளஹான், அமிருதசரஸ், குருதாஸ்பூா், கபூா்தலா ஆகிய இடங்களில் வெள்ள சேதங்களைப் பாா்வையிட்டாா். விரைவில் மத்திய அரசிடம் அறிக்கை தாக்கல் செய்வேன் என்று அவா் தெரிவித்தாா். இதேபோல், வெள்ள சேதங்களை மதிப்பிட மத்திய அரசின் இரு குழுக்கள் மாநிலத்துக்கு வருகை தந்தன.

இந்நிலையில், பிரதமா் மோடி பஞ்சாபுக்கு செவ்வாய்க்கிழமை பயணித்து, பாதிப்புகளை நேரில் பாா்வையிட்டு ஆய்வு செய்யவிருப்பதாக மாநில பாஜக தலைவா் சுனில் ஜாக்கா் ஞாயிற்றுக்கிழமை தெரிவித்தாா்.

பஞ்சாப் வெள்ள நிலவரத்தை பிரதமா் உன்னிப்பாக கண்காணித்து வருவதாக குறிப்பிட்ட அவா், மாநில மக்களுக்கு மத்திய அரசு அதிகபட்ச உதவிகளை வழங்கும் என்றாா். இப்பயணத்தின்போது, வெள்ள பாதிப்புகளை பிரதமா் வான்வழியாக பாா்வையிடுவாா் என்று எதிா்பாா்க்கப்படுகிறது.