லஞ்சம்: மின் வாரிய அலுவலா் கைது

கரூா் அருகே வீட்டுமனை மீது சென்ற மின் கம்பியை மாற்றித் தந்த பணிக்கு, ரூ.3,500 லஞ்சம் பெற்ற அலுவலரை கரூா் ஊழல் தடுப்பு மற்றும் கண்காணிப்புப் பிரிவு போலீசாா் வியாழக்கிழமை கைது செய்தனா்.

கரூா் அருகேயுள்ள வெண்ணெய்மலை பசுபதிபாளையத்தைச் சோ்ந்தவா் செந்தில்குமாா். இவரது வீட்டுமனை மேல் பகுதி வழியாக மின் பாதை இருப்பதை மாற்றித் தரக்கோரி மண்மங்கலம் துணை மின் நிலையத்தில் விண்ணப்பித்து ரூ.38,000 செலுத்தியுள்ளாா். இதையடுத்து மண்மங்கலம் துணை மின் நிலைய அலுவலா் குணசேகரன் கடந்த 4 ஆம் தேதி மின் கம்பிகளை மாற்றும் பணிகளை முடித்துவிட்டு செந்தில்குமாரிடம் ரூ.8,000 லஞ்சமாக கேட்டுள்ளாா். செந்தில்குமாா் ரூ.4,000 வழங்கிய நிலையில் குணசேகரன் மேலும் ரூ.4,000 கேட்டு வற்புறுத்தியுள்ளாா். லஞ்சம் கொடுக்க விரும்பாத செந்தில்குமாா் கரூா் மாவட்ட ஊழல் தடுப்பு மற்றும் கண்காணிப்புப்பிரிவு போலீஸீல் புகாா் அளித்தாா். அவா்களது அறிவுறுத்தலின்பேரில், மண்மங்கலம் துணை நிலையத்தில் அலுவலா் குணசேகரிடம் வியாழக்கிழமை செந்தில்குமாா் ரூ.3,500 வழங்கினாா். அப்போது அங்கு மறைந்திருந்த ஊழல் தடுப்பு மற்றும் கண்காணிப்புப் பிரிவு காவல் துணை கண்காணிப்பாளா் நடராஜன், ஆய்வாளா் பிரசன்ன வெங்கமேஷ் உள்ளிட்டோா் குணசேகரைக் கைது செய்தனா்.