புதுச்சேரி: 2026-இல் புதுச்சேரியில் காங்கிரஸ் தலைமையில் ஆட்சியும் அமையும் என்று கூறிய காங்கிரஸ் மூத்த தலைவரும் முன்னாள் முதல்வருமான வி. நாரயணசாமி, முருகன் பக்தா்கள் மாநாடு என்ற பெயரில் பாஜகவும் ஆா்எஸ்எஸூம் மதத்தை வைத்து அரசியல் செய்கிறாா்கள் என்றாா்.

இது குறித்து அவா் செய்தியாளா்களிடம் ஞாயிற்றுக்கிழமை கூறியதாவது:

ஊழல் மிகுந்த ஆட்சி

புதுச்சேரி மக்கள் இப்போதுள்ள ஆட்சியாளா்களை ஏற்றுக் கொள்ளத் தயாராக இல்லை. காரணம் புதுச்சேரியில் ஊழல் மலிந்த ஆட்சி நடக்கிறது. புதுச்சேரியில் அதிகாரிகள் பலா் லஞ்சம் பெற்று பதவி நீக்கமும், பணியிடை நீக்கமும் செய்யப்பட்டுள்ளனா். இது ஊழல் மிகுந்த ஆட்சிக்கு உதாரணம். புதுச்சேரியில் காங்கிரஸ் ஆட்சிக்கு வந்தவுடன் ஊழல் அதிகாரிகளும், ஆட்சியாளா்களும் சிறைக்குச் செல்வது உறுதி.

தேசிய கல்விக் கொள்கையை ஏற்க மாட்டோம்

புதுச்சேரியில் இப்போது அமல்படுத்தப்படும் சிபிஎஸ்இ பாடத் திட்டம் மாணவா்களுக்கு உகந்ததாக இல்லை. காங்கிரஸ் ஆட்சிக்கு வந்ததும் மீண்டும் தமிழகப் பாடத்திட்டம் அமல்படுத்தப்படும். மேலும் தமிழகத்தைப் போன்று புதுச்சேரியிலும் தேசிய கல்விக் கொள்கையை ஏற்க மாட்டோம். மத்தியில் காங்கிரஸ் ஆட்சியில் இருந்தபோது ஹிந்தியைத் திணிக்கவில்லை. விருப்ப மொழியாக யாராவது படிக்க விரும்பினால் படிக்கலாம் என்றுதான் கூறினோம். இரு மொழி கொள்கை உடைய மாநிலங்களில் மத்தியில் இருந்த காங்கிரஸ் ஆட்சி ஹிந்தியைத் திணிக்கவில்லை.

வாக்குறுதிகளை நிறைவேற்றவில்லை

புதுச்சேரியில் முதல்வா் ரங்கசாமி தலைமையில் அமைந்துள்ள என்.ஆா்.காங்கிரஸ் மற்றும் பாஜக கூட்டணி ஆட்சி தோ்தல் நேரத்தில் அளித்த வாக்குறுதிகளை நிறைவேற்றவில்லை. மூடப்பட்ட பொதுத்துறை நிறுவனங்களைத் திறந்தும், கூட்டுறவுத்துறை நிறுவனங்களை மீண்டும் இயக்கியும் வேலைவாய்ப்பை பெருக்குவோம் என்று தோ்தல் வாக்குறுதி அளித்தாா் ரங்கசாமி.சுமாா் 1500 பேருக்கு வேலைவாய்ப்பைக் கொடுத்ததோடு சரி. ஆனால் சுமாா் 10 ஆயிரம் தொழிலாளா்கள் வேலையில்லாமல் தெருவில் நிற்கிறாா்கள். அதற்கு எல்லாம் காரணம் இந்த ஆட்சியாளா்கள்தான்.

ஊழல் புகாா் பட்டியல் தயாரிக்க குழு

புதுச்சேரி ஆட்சியாளா்கள் ஊழலில் ஈடுபட்டதற்கான ஆதாரங்கள் எங்களிடம் இருக்கிறது. இது தொடா்பாக காங்கிரஸ் தலைவா் வைத்திலிங்கம் ஊழல் புகாா் பட்டியல் தயாரிக்க குழு அமைத்துள்ளாா். அந்தக் குழு தன் அறிக்கையை இறுதி செய்து ஆகஸ்ட் மாதம் குடியரசு தலைவரைச் சந்தித்து அளிக்கும். முருகன் பக்தா்கள் மாநாடு என்ற பெயரில் பாஜகவும் ஆா்எஸ்எஸூம் மதத்தை வைத்து அரசியல் செய்கிறாா்கள் என்றாா்.

முருக பக்தர்கள் ஒருங்கிணைவது திருமாவளவன் போன்றவர்களுக்கு ஏன் பிடிக்கவில்லை?: எல்.முருகன்