ஸ்ரீரங்கம் அருள்மிகு அரங்கநாதர் திருக்கோயிலில் நடைபெற்று வந்த ஊஞ்சல் உற்ஸவ விழா தீர்த்தவாரியுடன் செவ்வாய்க்கிழமை நிறைவு பெற்றது.
ஒன்பது நாள்கள் நடைபெறும் ஊஞ்சல் உற்ஸவ விழா நவம்பர் 6 -ஆம் தேதி தொடங்கியது. முக்கிய நிகழ்வான நெல்லளவு கண்டருளும் வைபவம் ஞாயிற்றுக்கிழமை (நவ. 12)நடைபெற்றது.
விழாவின் நிறைவு நாளான தீர்த்தவாரி கண்டருல் நிகழ்ச்சி செவ்வாய்க்கிழமை நடைபெற்றது. காலை 9 மணிக்கு சிறப்பு அலங்காரத்தில் நம்பெருமாள் மூலஸ்தானத்திலிருந்து புறப்பட்டு, சந்திர புஷ்கரணி குளத்துக்கு எழுந்தருளினார். அங்கு வேதமந்திரங்கள் முழங்க சந்திர புஷ்கரணியில் நம்பெருமாளுக்கு தீர்த்தவாரி கண்டருளப்பட்டது.
பின்னர், அங்கிருந்து காலை 10.15 மணிக்கு நம்பெருமாள் ஊஞ்சல் மண்டபம் வந்தடைந்தார். அங்கு திருமஞ்சனம் கண்டருளி அலங்காரம் அமுது செய்தல் நிகழ்ச்சி நடைபெற்றது.
மாலை 6 மணிக்கு ஊஞ்சல் மண்டபத்தில் நம்பெருமாள் எழுந்ததருளி சேவை சாதித்தார். இரவு 8 மணிக்கு நம்பெருமாள் புறப்பட்டு 9.15 மணிக்கு மூலஸ்தானம் சென்றடைந்தார்.