4-ஆவது டெஸ்ட்: ஹனுமா விஹாரி விலகல்

புது தில்லி: ஆஸ்திரேலியாவுக்கு எதிரான 4-ஆவது மற்றும் கடைசி டெஸ்ட் கிரிக்கெட் போட்டியிலிருந்து இந்திய வீரர் ஹனுமா விஹாரி காயம் காரணமாக விலகியுள்ளார்.

சிட்னி டெஸ்ட் போட்டியில் அஸ்வினுடன் இணைந்து அபாரமாக ஆடி இந்திய அணியை தோல்வியிலிருந்து மீட்ட ஹனுமா விஹாரிக்கு தொடைப் பகுதியில் தசைநார் முறிவு ஏற்பட்டுள்ளதால், அவர் கடைசி போட்டியிலிருந்து விலகியுள்ளார். 

இது தொடர்பாக பிசிசிஐ வட்டாரங்கள் கூறுகையில், "ஹனுமா விஹாரிக்கு ஸ்கேன் பரிசோதனை மேற்கொள்ளப்பட்டுள்ளது. அதன் முடிவுகள் வந்த பிறகே அவருடைய காயத்தின் நிலை குறித்து தெரியவரும். லேசான தசைநார் முறிவாக இருந்தாலும்கூட, அவர் குறைந்தபட்சம் 4 வாரங்கள் ஓய்வில் இருக்க வேண்டியது அவசியமாகும். 4-ஆவது டெஸ்ட் போட்டிக்கு 3 நாள்கள் மட்டுமே உள்ளதால், ஹனுமா விஹாரி விளையாட வாய்ப்பில்லை. இதேபோல் இங்கிலாந்துக்கு எதிரான தொடரிலும் அவர் விளையாடமாட்டார்' என தெரிவித்தன.

கடைசி டெஸ்ட் போட்டியில் ஹனுமா விஹாரிக்குப் பதிலாக மயங்க் அகர்வால் களமிறக்கப்படுவார் என தெரிகிறது. இதேபோல் இடது கை பெருவிரலில் காயம் அடைந்த ரவீந்திர ஜடேஜாவுக்குப் பதிலாக ஷர்துல் தாக்குர் விளையாடுவார் என பிசிசிஐ வட்டாரங்கள் தெரிவித்தன. 4-ஆவது டெஸ்ட் போட்டி வரும் 15-ஆம் தேதி பிரிஸ்பேனில் தொடங்குகிறது.