ஐடிஎஃப் டென்னிஸ்: இறுதிச்சுற்றில் ஜீவன்-விக்டர் மோதல்

எம்சிசி-சுப்பிரமணியம் நினைவு ஐடிஎஃப் டென்னிஸ் போட்டியில் சனிக்கிழமை நடைபெறும் இறுதிச்சுற்றில் இந்தியாவின் ஜீவன் நெடுஞ்செழியன்-ருமேனியாவின் விக்டர் கிரிவாய் ஆகியோர் மோதுகின்றனர்.

சென்னை எழும்பூரில் உள்ள மேயர் ராதாகிருஷ்ணன் மைதானத்தில் நடைபெற்று வரும் இப் போட்டியில் வெள்ளிக்கிழமை நடைபெற்ற ஆடவர் ஒற்றையர் அரையிறுதி ஆட்டங்களில் இந்தியாவின் ஜீவன் நெடுஞ்செழியன் 7-6 (2), 2-6, 6-2 என்ற செட் கணக்கில் பிரான்ஸின் தக் குன் வாங்கையும், ருமேனியாவின் விக்டர் கிரிவாய் 6-3, 6-2 என்ற நேர் செட்களில் பிரேசிலின் தலேஸ் துருனியையும் வீழ்த்தி இறுதிச்சுற்றுக்கு முன்னேறினர்.

ஆரட்டா-அருண் ஜோடி சாம்பியன்: ஆடவர் இரட்டையர் இறுதிச்சுற்றில் ஜப்பானின் ஆரட்டா ஒனோஸாவா-இந்தியாவின் அருண் பிரகாஷ் ஜோடி 6-4, 0-6, 10-7 என்ற செட் கணக்கில் இந்தியாவின் ஸ்ரீராம் பாலாஜி-ஜீவன் நெடுஞ்செழியன் ஜோடியை வீழ்த்தி பட்டம் வென்றது.