ஐசிசியின் ஒருநாள் போட்டிகளுக்கான பேட்டிங் தரவரிசையில் இந்திய அணியின் துணைக் கேப்டன் ஸ்மிருதி மந்தனா மீண்டும் முதலிடம் பிடித்துள்ளார்.

ஒருநாள் போட்டிகளில் சிறந்த வீராங்கனைகளுக்கான தரவரிசைப் பட்டியலை ஐசிசி இன்று (ஜூன் 17) வெளியிட்டது. இந்த தரவரிசையில் இந்திய அணியின் துணைக் கேப்டன் ஸ்மிருதி மந்தனா, 6 ஆண்டுகளில் முதல் முறையாக முதலிடத்துக்கு முன்னேறியுள்ளார். அவர் கடைசியாக கடந்த 2019 ஆம் ஆண்டு ஒருநாள் போட்டிகளுக்கான பேட்டிங் தரவரிசையில் முதலிடம் பிடித்திருந்தார்.

தென்னாப்பிரிக்க அணியின் கேப்டன் லாரா வோல்வர்ட் 19 புள்ளிகளை இழந்து மூன்றாமிடத்துக்கு சறுக்கினார். 727 ரேட்டிங் புள்ளிகளுடன் ஸ்மிருதி மந்தனா முதலிடத்திலும், தலா 719 ரேட்டிங் புள்ளிகள் பெற்று இங்கிலாந்து அணியின் கேப்டன் நாட் ஷிவர் பிரண்ட் மற்றும் தென்னாப்பிரிக்க அணியின் கேப்டன் லாரா வோல்வர்ட் இரண்டாம் மற்றும் மூன்றாமிடங்களிலும் உள்ளனர்.

இதையும் படிக்க: பந்தை சேதப்படுத்தியதாக அஸ்வின் மீது புகார்; ஆதாரம் கேட்கும் டிஎன்பிஎல்!

ஸ்மிருதி மந்தனாவை தவிர்த்து, இந்த தரவரிசையில் இந்திய வீராங்கனைகளான ஜெமிமா ரோட்ரிக்ஸ் மற்றும் கேப்டன் ஹர்மன்பிரீத் கௌரும் இடம்பெற்றுள்ளனர். அவர்கள் முறையே 14 மற்றும் 15 ஆம் இடங்களில் உள்ளனர்.

அண்மையில் இலங்கை மற்றும் தென்னாப்பிரிக்க அணிகளுக்கு எதிரான முத்தரப்பு தொடரில் ஸ்மிருதி மந்தனா அபாரமாக செயல்பட்டார். ஒருநாள் போட்டிகளுக்கான தரவரிசையில் நீண்ட இடைவெளிக்குப் பிறகு முதலிடம் பிடித்துள்ள அவர், டி20 போட்டிகளுக்கான பேட்டிங் தரவரிசையில் 4-வது இடத்தில் உள்ளது குறிப்பிடத்தக்கது.