சிதம்பரம் நடராஜர் கோயில்  சிவகாமி அம்மன் தேர் ரூ.32 லட்சத்தில் புனரமைப்பு

சிதம்பரம் நடராஜர் கோயிலில் உள்ள சிவகாமி அம்மன் தேர் ரூ.32 லட்சம் செலவில் புனரமைக்கும் பணி தீவிரமாக நடைபெற்று வருகிறது.

சிதம்பரம் நடராஜர் கோயிலில் 5 தேர்கள் உள்ளன. இவற்றில், நடராஜப் பெருமானுக்கும், சிவகாமி அம்மனுக்கும் பெரியத் தேர்கள் உள்ளன. விநாயகர், முருகன், ஸ்ரீசண்டிகேஸ்வரர் ஆகிய மூவருக்கும் சிறிய தேர்கள் உள்ளன.

÷நடராஜர் கோயிலில் ஆண்டுதோறும் ஆனித் திருமஞ்சன தரிசன உற்சவம், மார்கழி ஆருத்ரா தரிசன உற்சவம் ஆகிய இரு உற்சவங்கள் நடைபெறும். இந்த உற்சவத்தில் 9-ம் நாள் திருவிழாவாக தேர்த் திருவிழா நடைபெறுகிறது.

÷தேர் உற்சவத்திற்கான செலவுத்தொகை பச்சையப்பன் அறக்கட்டளை சார்பில் வழங்கப்படுகிறது. நடராஜர் மற்றும் சிவகாமி அம்மன் தேர்களை பச்சையப்பன் அறக்கட்டளை பராமரிப்பு செய்து வருகிறது.

÷இந்நிலையில் சிவகாமி அம்மன் தேர் பழுதுற்றுள்ளதால், அத்தேரை புனரமைக்க பச்சையப்பன் அறக்கட்டளையின் இடைக்கால நிர்வாக அதிகாரியாக நியமிக்கப்பட்டுள்ள முன்னாள் தலைமை தேர்தல் அதிகாரி டி.என்.சேஷன் உத்தரவிட்டுள்ளார்.

÷அதன் பேரில் தேரை புனரமைக்க காஞ்சிபுரம், மயிலாடுதுறை பகுதியிலிருந்து கலைஞர்கள் வரவழைக்கப்பட்டு, ரூ.32 லட்சத்தில் பணிகள் மேற்கொள்ளப்பட்டுள்ளன. ÷டி.என்.சேஷன் நேரடி மேற்பார்வையில் பொறியாளர் ஒருவர் அனுப்பி வைக்கப்பட்டு பணிகள் தொடங்கப்பட்டுள்ளன.

÷சிவகாமி அம்மன் தேர் முற்றிலுமாக பிரிக்கப்பட்டு, புதிதாக புனரமைக்கும் பணிகள் அதிவேகமாக நடைபெற்று வருகின்றன. ஜூலை மாதம் 13, 14 தேதிகளில் நடைபெறவுள்ள தேர் மற்றும் தரிசன உற்சவத்திற்குள் தேர் புனரமைக்கப்பட்டு விடும் என கோயில் பொதுதீட்சிதர்கள் தெரிவித்தனர்.