கம்பம்: முல்லைப்பெரியாறு அணைப்பகுதியில் தொடர்ந்து பெய்து வரும் கன மழையால் அதிக நீர்வரத்து ஏற்பட்டு, ஒரே நாளில் நீர்மட்டம் 7 அடி உயர்ந்துள்ளது.

தென்மேற்கு பருவமழை தீவிரமடைய தொடங்கியதையடுத்து, பெரியாறு அணையின் நீர் பிடிப்பு பகுதிகளில் பலத்த மழை பெய்து வருகிறது.

அணைப்பகுதியில், 198 மில்லி மீட்டர் மழையும், தேக்கடி ஏரி பகுதியில், 157 மி.மீ. மழையும் பெய்தது. இதனால் அணைக்கு வெள்ளிக்கிழமை நிலவரப்படி  17,746 கன அடி தண்ணீர் வந்தது. இதனால் பெரியாறு அணையின் நீர்மட்டம்  வியாழக்கிழமை 123.20 அடி உயர்ந்த நிலையில், வெள்ளிக்கிழமை 130 அடியாக உயர்ந்தது.  

நீர்மட்டம் ஒரே நாளில் 7 அடியாக உயர்ந்திருப்பதால், தேனி, திண்டுக்கல், மதுரை, சிவகங்கை, ராமனாதபுரம் மாவட்ட மக்கள் மகிழ்ச்சியடைந்துள்ளனர்.

நீர் மட்ட விவரம்: வெள்ளிக்கிழமை நிலவரப்படி அணையின் நீர்மட்டம் 130 அடியாகவும், நீர் இருப்பு 4,697 மில்லியன் கன அடியாகவும், அணைக்குள் நீர் வரத்து விநாடிக்கு 17 ஆயிரத்து 746 கன அடியாகவும், தமிழகப் பகுதிக்கு நீர் வெளியேற்றம் விநாடிக்கு 1,650 கன அடியாகவும் இருந்தது.