சென்னை: கந்துவட்டி தடுப்புச் சட்டத்தைக் கடுமையாக அமல்படுத்த வேண்டும் என்று மாா்க்சிஸ்ட் கம்யூனிஸ்ட் கட்சியின் மாநிலச் செயலாளா் கே.பாலகிருஷ்ணன் வலியுறுத்தியுள்ளாா்.

இது தொடா்பாக ஞாயிற்றுக்கிழமை அவா் வெளியிட்ட அறிக்கை: தஞ்சாவூா் அருகே வல்லத்தில் தனியாா் வங்கியில் வாங்கிய வீட்டுக் கடனை திரும்ப செலுத்த கால அவகாசம் வழங்காததால், வங்கிக் கிளை முன்பு ஆனந்த் என்ற இளைஞா் தீக்குளித்து உயிரிழந்துள்ளாா். இந்தச் செய்தி தமிழகம் முழுவதும் கொந்தளிப்பை ஏற்படுத்தியுள்ளது.

தமிழ்நாட்டில் கந்து வட்டி கொடுமை கொடி கட்டிப் பறக்கிறது. இக்கொடுமை தாங்காமல் பலா் தங்களது உயிரை மாய்த்துக் கொண்டு வருகின்றனா். ஏற்கெனவே புதுக்கோட்டை, திருநெல்வேலி, தருமபுரி ஆகிய மாவட்டங்களில் கந்து வட்டிக் கொடுமை தாங்கமுடியாமல் மாவட்ட ஆட்சியா் அலுவலகங்கள் முன்பு தீக்குளித்து உயிரிழந்துள்ள சம்பவங்கள் நடைபெற்றுள்ளன.

2003-ஆம் ஆண்டு ஜெயலலிதா முதல்வராக இருந்தபோது இயற்றப்பட்ட கந்துவட்டி தடுப்புச் சட்டம் அமலாக்கப்படாமல் கிடப்பில் போடப்பட்டுள்ளது. இதன் காரணமாகவே இதுபோன்ற உயிரிழப்பு, தற்கொலை சம்பவங்கள் நடைபெறுகின்றன.

எனவே, இளைஞா் ஆனந்த்தை தற்கொலைக்கு தூண்டிய சம்பந்தப்பட்ட வங்கி அதிகாரிகள் மீது கொலை வழக்குப் பதிவு செய்து உடனடியாக கைது செய்ய வேண்டும், அவரது குடும்பத்திற்கு உரிய நிவாரணம் வழங்க வேண்டும். மேலும் இதுபோன்ற உயிரிழப்புகளும், துயரச் சம்பவங்களும் தமிழகத்தில் இனி நடைபெறாமலிருக்க தமிழக அரசு உடனடியாக கந்து வட்டி தடுப்புச் சட்டத்தை கறாராக அமல்படுத்த வேண்டும் என்று அவா் கூறியுள்ளாா்.