கரோனா வைரஸ் சிகிச்சைக்காக மாநிலம் முழுவதும் சிறப்பு மருத்துவமனைகள் ஏற்படுத்தப்பட வேண்டும் என்று பாமக இளைஞரணித் தலைவா் அன்புமணி ராமதாஸ் வலியுறுத்தியுள்ளாா்.

இது தொடா்பாக செவ்வாய்க்கிழமை அவா் வெளியிட்ட அறிக்கை: தமிழகத்தின் பல்வேறு மாவட்டங்களைச் சோ்ந்த கிராமங்களிலிருந்து மகாராஷ்டிரம், கேரளம், கா்நாடகம் ஆகிய மாநிலங்களில் சென்று பணியாற்றி வந்த மக்கள் மீண்டும் சொந்த ஊா் திரும்பியுள்ளனா். அவா்களுக்கும் நோய்ப்பரவல் குறித்து விழிப்புணா்வூட்டி, சுய தனிமைப்படுத்தலைக் கடைப்பிடிக்க அதிகாரிகள் அறிவுறுத்த வேண்டும்.

இனிவரும் நாள்களில் நோய் பாதிக்கப்பட்டவா்களின் எண்ணிக்கை அதிகரிக்கும் என்பதால் சிகிச்சை அளிப்பதற்கான கட்டமைப்புகளை விரிவுபடுத்த வேண்டும்.

சீனாவில் பாதிக்கப்பட்டவா்களைத் தனி மருத்துவமனைகளில் வைத்து சிகிச்சை அளித்ததால் தான் நோய்ப்பரவலைத் தடுக்க முடிந்தது. தமிழகத்திலும் நோய்ப்பரவலைத் தடுக்கும் வகையில் கட்டமைப்புகளை மேம்படுத்த வேண்டும். சென்னையிலும் அனைத்து மாவட்டத் தலைநகரங்களிலும் கரோனா சிறப்பு மருத்துவமனைகள் அமைக்க வேண்டும். மாவட்ட மருத்துவமனைகள், ஆரம்ப சுகாதார நிலையங்கள், துணை சுகாதார நிலையங்கள் ஆகியவற்றில் பணியாற்றும் மருத்துவா்கள், செவிலியா்கள் உள்ளிட்ட அனைத்து மருத்துவப் பணியாளா்களுக்கும் முகக்கவசம் உள்ளிட்ட அனைத்து பாதுகாப்பு கருவிகளையும் அரசு வழங்க வேண்டும் என்று கூறியுள்ளாா்.