தமிழகத்தில் 5 புதிய நிறுவனங்கள் தொழில் தொடங்குவதற்கான முதலீடுகளை மேற்கொள்ள, முதல்வா் மு.க.ஸ்டாலின் தலைமையில் செவ்வாய்க்கிழமை நடைபெற்ற அமைச்சரவைக் கூட்டத்தில் ஒப்புதல் அளிக்கப்பட்டது.

சென்னை தலைமைச் செயலகத்தில் உள்ள அமைச்சரவைக் கூட்ட அரங்கில் காலை 11 மணிக்கு கூட்டம் தொடங்கியது. சுமாா் ஒரு மணி நேரம் 15 நிமிடங்கள் வரை நடைபெற்ற கூட்டத்தில்,பல்வேறு முக்கிய விஷயங்கள் குறித்து ஆலோசிக்கப்பட்டதாகத் தகவல்கள் வெளியாகியுள்ளன.

தொழில் ஆலைகள்: பெட்ரோனஸ், காட்டா்பில்லா் உள்ளிட்ட 5 புதிய நிறுவனங்கள் தமிழகத்தில் தொழில் தொடங்குவதற்கான முதலீடுகளை மேற்கொள்ள அமைச்சரவைக் கூட்டத்தில் ஒப்புதல் அளிக்கப்பட்டுள்ளதாகத் தெரிகிறது. மேலும், பல்வேறு தொழில் நிறுவனங்களின் முதலீடுகளை ஈா்க்கும் வகையில், சிங்கப்பூா், லண்டன் உள்ளிட்ட நாடுகளுக்கு முதல்வா் மு.க.ஸ்டாலின் சுற்றுப் பயணம் மேற்கொள்ளவுள்ளாா்.

மே மாதம் மூன்றாவது வாரத்தில் அவா் பயணம் மேற்கொள்வாா் என எதிா்பாா்க்கப்படுகிறது. இதற்கான ஒப்புதல்களும் அமைச்சரவைக் கூட்டத்தில் பெறப்பட்டதாகத் தெரிகிறது. மேலும், ஜூன் 3-ஆம் தேதி முன்னாள் முதல்வா் கருணாநிதி நூற்றாண்டு விழாவை தமிழகம் முழுவதும் சிறப்பாகக் கொண்டாடுவது குறித்தும் ஆலோசனை மேற்கொள்ளப்பட்டதாகத் தெரிகிறது. கருணாநிதி நூற்றாண்டு விழாவுக்கு குடியரசுத் தலைவா் வருகை, மதுரை கலைஞா் நூலகம் திறப்பு விழா மற்றும் திருவாரூரில் நடைபெறவுள்ள விழாக்களுக்கான ஏற்பாடுகளை மேற்கொள்வது குறித்தும் ஆலோசனை மேற்கொள்ளப்பட்டு, பல்வேறு அறிவுரைகளை முதல்வா் மு.க.ஸ்டாலின் வழங்கியதாகத் தகவல்கள் தெரிவிக்கின்றன.

உதயநிதி தகவல்: இதனிடையே, அமைச்சரவைக் கூட்டம் குறித்து, இளைஞா் நலன் மற்றும் விளையாட்டு மேம்பாட்டுத் துறை அமைச்சா் உதயநிதி ஸ்டாலின் தனது ட்விட்டா் பக்கத்தில் செய்தியைப் பதிவிட்டுள்ளாா். சட்டப்பேரவை கூட்டத் தொடரில் நிதிநிலை அறிக்கை மற்றும் மானிய கோரிக்கையின் போது வெளியிடப்பட்ட அறிவிப்புகளை செயல்படுத்துவது தொடா்பாகவும், இரண்டு ஆண்டு கால திமுக அரசின் சாதனைகள், திட்டங்களை மக்களிடம் எடுத்துக் கூறுவது தொடா்பாகவும் அமைச்சரவைக் கூட்டத்தில் பல்வேறு ஆலோசனைகளை முதல்வா் மு.க.ஸ்டாலின் வழங்கியதாக அந்த பதிவில் தெரிவிக்கப்பட்டுள்ளது.