ஜூன் 30-ஆம் தேதியுடன் முடிவடைந்த நடப்பு நிதியாண்டின் முதல் காலாண்டில் பஜாஜ் எலக்ட்ரிக்கல்ஸின் நிகர விற்பனை 42.25 சதவீதம் அதிகரித்துள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த ஏப்ரல் முதல் ஜூன் வரையிலான காலகட்டத்தில் நிறுவனம் ரூ.41.19 கோடி ஒருங்கிணைந்த நிகர லாபம் ஈட்டியுள்ளது.

முந்தைய நிதியாண்டின் ஏப்ரல்-ஜூன் காலாண்டில் நிறுவனம் ரூ. 24.97 கோடி நிகர இழப்பை சந்தித்திருந்தது.

நடப்பு நிதியாண்டின் முதல் காலாண்டில் நிறுவனத்தின் நிகர விற்பனை 42.25 சதவீதம் உயா்ந்து ரூ.1,202.10 கோடியாக இருந்தது. முந்தைய நிதியாண்டின் இதே காலகட்டத்தில் நிறுவனத்தின் நிகர விற்பனை ரூ.845.04 கோடியாக இருந்தது.

2022-23 நிதியாண்டின் முதல் காலாண்டில் நிறுவனத்தின் மொத்த செலவுகள் 31.66 சதவீதம் அதிகரித்து ரூ. 1,180.71 கோடியாக உள்ளது. முந்தைய ஆண்டின் இதே காலக்கட்டத்தில் அது ரூ.896.78 கோடியாக இருந்தது.

2022 ஏப்ரல்-ஜூன் காலாண்டில் நுகா்வோா் பொருள்களின் விற்பனை மூலம் நிறுவனம் பெற்ற வருவாய் 57.62 சதவீதம் அதிகரித்து ரூ.972.93 கோடியாக இருந்தது. இது கடந்த ஆண்டின் இதே காலகட்டத்தில் ரூ.617.26 கோடியாக இருந்தது.

பொறியியல், கொள்முதல் மற்றும் கட்டுமானப் பிரிவில் நிறுவனத்தின் வருவாய் ரூ.239.52 கோடியிலிருந்து 6.9 சதவீதம் உயா்ந்து ரூ.256.07 கோடியாக உள்ளது என்று அந்த செய்திக்குறிப்பில் தெரிவிக்கப்பட்டுள்ளது.