தகவல் தொழில்நுட்ப சேவை நிறுவனமான டெக் மஹிந்திராவின் ஒருங்கிணைந்த நிகர லாபம் 41 சதவீதம் சரிந்தது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஜனவரி முதல் மாா்ச் வரையிலான 2023-24-ஆம் நிதியாண்டின் கடைசி காலாண்டில் நிறுவனத்தின் ஒருங்கிணைந்த நிகர லாபம் ரூ.661 கோடியாகப் பதிவாகியுள்ளது.

முந்தைய 2022-23-ஆம் நிதியாண்டின் இதே காலாண்டோடு ஒப்பிடுகையில் இது சுமாா் 41 சதவீதம் குறைவாகும்.

அதேபோல், மதிப்பீட்டு காலாண்டில் நிறுவனத்தின் வருவாயும் முந்தைய நிதியாண்டின் அதே காலாண்டோடு ஒப்பிடுகையில் 6.2 சதவீதம் குறைந்து ரூ.12,871 கோடியாக உள்ளது.

2023-24-ஆம் நிதியாண்டு முழுமைக்கும் நிறுவனத்தின் ஒருங்கிணைந்த நிகர லாபம் முந்தைய நிதியாண்டைவிட 51.2 சதவீதம் சரிந்து ரூ.2,358 கோடியாக உள்ளது. வருவாய் 2.4 சதவீதம் குறைந்து ரூ.51,996 கோடியாக உள்ளது என்று அந்த அறிக்கையில் குறிப்பிடப்பட்டுள்ளது.